L Lhobo i la Cigunha
Traduçon i adaptaçon para mirandés por Alcides Meirinhos. Dezeinhos oureginales de Ana Afonso https://anafonso.com/
PUB • CONTINUE A LER A SEGUIR
Era ua beç un lhobo mui guloso que bagamundiaba pul monte buscando quemida. Nua manhana de suorte, achou las sobras dun animal muorto i ampeçou a quemé-lo cun tanta priessa que mal maçcaba ls uossos.
Nun repente, botou un grande ouleio de delor.
- Ai!!! Ai de mi! Quien acude!
PUB • CONTINUE A LER A SEGUIR
Un uosso mui grande antrasgara-se-le nas gorjas. Quanto más spurmentaba angulhir, más l uosso l s’antrasgaba. L lhobo mal era capaç de resfolgar.
Mui agoniado, corriu pal monte a pedir ajuda.
- Quien me lhibrar deste uosso recebirá ua grande prepina! Pormeto pagar muito i bien!
Ls animales oubírun-lo, mas ningún s’astrebiu a arrimar-se al lhobo sfameado. Tenien miedo que el nun cumprisse la pormessa i se zampasse neilhes.
Solo ua cigunha, conhecida por ser mui buona i pul sou grande cachaço i bico delgado, resulbiu ajudá-lo.
PUBLICIDADE
- Se me pormetes que nun me fazerás mal, spurmentarei a salbar-te.
- Juro! – respundiu l lhobo. – Tenerás la recumpensa que mereces.
La cigunha arrimou-se cun cuidado. Metiu l grande bico nas gorjas de l lhobo i, mui a jeitico, fui capaç de agarrar l uosso i sacá-lo.
L lhobo respirou de alíbio.
- Que assi dolien ls carrielhos, mas... stou salbo!
La cigunha botou ua risica.
PUBLICIDADE
- Quedo feliç por haber ajudado. Agora, adonde stá la prepina que pormetiste?
L lhobo mirou-la por un cachico i ampeçou a rir-se.
- Prepina? Recumpensa? Yá tubiste prepina que chegue.
- Bonda! Mas tu inda nun cumpriste l pormetido.
- Anton, metiste la cabeça na boca dun lhobo... i fuste capaç de la sacar d’alhá anteira! Que maior prepina quieres?
Dito isto, birou cuostas i metiu-se pa las touças, deixando la cigunha spantada i zeiludida.
Anton la cigunha cumprendiu que hai pormessas que nunca deberien de ser lhebadas a la séria quando bénen de quien nun ten honra nien gratidon.
Moral:
Nun speres gratidon de quien nun conhece justícia nien honra.
PUB • CONTINUE A LER A SEGUIR













