L Lhion i l Ratico

Era ua beç un fuorte lhion que drumie tranquilo a la selombra d’ua grande árbol. Anquanto çcansaba, un ratico, çcuidado i trabiesso, ampeçou a poulos i corridas anriba del. Gustaba de sentir l pelo ameroso de l lhion i scunder-se no meio de las greinhas de l cachaço.

Nisto, l lhion acordou i nun rodion prendiu l ratico ambaixo d’ua patorra. 

Ancarando bechico assustado i diç arreganhando ls caneiros brancos i afilados:

• Cumo ye que tu te astrebes a anquemodar l rei de ls animales? – rugiu l lhion. – Habie de te matar para que daprendiras a respeitar l miu çcanso.

L ratico, tembrando de miedo, rogou-le:

• Tiu Lhion, pido-bos que me perdoneis. Fui sien querer que bos zanquemodei. Se hoije me poupardes la bida, talbeç que you un die bos puoda pagar la buossa buona açon.

L lhion botou ua grande risada.

• Tu?! Un catabulho tan pequerrico? Mas dalgua beç tu poderies ajudar un lhion?

An todo l causo,  alegre cun la coraige de l rato, resuolbiu soltá-lo.

L tiempo fui passando i...

...un die quando caçaba no monte, l lhion caiu nua armadilha feita por caçadores. Ua rede mui fuorte anroscou-lo todo al redor, prendendo-lo por anteiro. Quanto más puxaba para se soltar, más apertadas quedában las cuordas.

Ls sous rugidos retumbórun por todo l termo.

L ratico oubiu aquel rugir i corriu adreitos alhá. Quando biu l lhion preso, arrimou-se sien miedo.

• Quedai quetico Tiu Lhion. Agora ye la mie beç de bos ajudar.

Cun ls dientes bien afilados, ampeçou a rober las cuordas de la rede. Robiu sien çcanso até que, ua apuis de outra, las cuordas quedórun cortadas.

An menos de nada l lhion staba lhibre.

Mirou agradecido pa l rato i dixo:

• Que anganhado que you staba al pensar que solo ls fuortes puoden ajudar. Hoije daprendi que até l más pequerrico de ls amigos puode fazer grandes façanhas.

O ratico botou ua risica.

• Ningún aceinho feito de buona gana, cai an saco roto.

Moral:

Fai l bien i nun mires a quien.