La Raposa i las ubas

Quando passou al pie de ua parreira, biu uas ubas mui grandes i maduras spinduradas de l alto.

• Que ubas tan pimponas! – dixo. – Dében de star bien gustosas!

La raposa arreculou uns passos, agarrou baláncio i poulou cun toda l’alma. Mas las ubas stában mui altas.

Spurmentou outra beç.

I apuis la terceira beç.

Poulou cada beç más alto, stubo quaije quaije quaije, mas nun era capaç de alcançar las ubas.

Cansada de tanto poular, sintou-se al tuoro de la parreira. Tornou a mirar pa las ubas i, para nun quedar inda más agoniada, botou-se a camino nun passo bagaroso.

Nisto, cai ua fuolha de l alto i eilha pensando que era un bago yá se purparaba pa lo abocar.

Bendo que era solo ua fuolha, diç:

• A bien dezir, até que nien tenie gana deilhas! Essas inda stan berdes. Dében de ser azedas cumo brunhos brabos i que naide quier.

Las ubas, maduras i docicas, eilhi quedórun a balanciar al aire, sien fazer causo de las palabras de la raposa.

Moral

Muita beç cumbencimos-mos de que algo nun ten balor solo porque nun somos capazes de lo tener.