Nuoba teorie de l Big-Bang
Tamien poderiemos ampeçar cul títalo: la felcidade eisiste?
Ou anton: la belocidade i la ounibersalidade de la felcidade, Fernando Pessoa vs. CR7!
Ou inda: cumo ye possible you screbir un post subre bola?
Ou mesmo: ourgasmos múltiplos: lhougo apuis de l sexo, assiste al terceiro golo de CR7 acontra la Spanha!
Ou tamien: yá dues nuites que drumo subre esto, i nun hai modo de se m’arredar!
Mas nó, nun bou por ende, solo eirei por adonde me lhieban mius própios passos…
Anque nun antenda grande cousa de mecánica quántica, asseguro-bos que l ouniberso cumprimido antes de se dar l Big-Bang era mui eidéntico a ua bola redonda: Ronaldo chutou-lo i l Big-Bang dou-se!
Naide sabe se hai dius, mas to l mundo sabe que RONALDO eisiste, i que ye pertués, i que segundo l percípio de l’ancerteza de Heisenberg, ls spanholes lo sáben al quadrado!
Ye berdade que todo esto nun proba nada acerca dua nuoba teorie de l Big-Bang, mas ye la proba absoluta, que ne l sfergante eisato an que un pertués, steia adonde stubir, assiste al terceiro golo de Ronaldo acontra la Spanha: la felcidade eisiste mesmo, l que ye eisatamente la mesma cousa. Antes you nien sabie l que era un “hat trick”!! Siempre a dapender cul nuosso CR7!
Carlos Ferreira
