La squila

Mas anton, se sou abó se iba ambora, apuis quien le habie de cuntar las cuontas al serano? I cumo haberie de daprender ls nomes de las arbles i de las yerbicas todas, que inda le faltaba tanta? Habie sido sou abó que le habie ansinado a armar las rateiras de ls paixaricos, an riba dua buosta i cun la formiga d’ala bien anganchada ne l ferrico ...
Agora sou abó stába eilhi stendido a drumir naqueilha caixa, amarielho cumo la cera de las belas cun que habien anfeitado la preça de casa pa la çpedida, ...i tan friu, que el bien biu que staba mi friu quando le deixórun dar un beisico pa se çpedir i le dixo baixico al oubido que yá tenie un anchiente de formigas d’ala pa las rateiras de Bal Trabiesso.
Saliu cul tarraço de las sobras pa las botar a Piloto.
Tamien habie sido sou abó que le habie ansinado a ajudar a la missa. Que a bien dezir, isso de pouco habie serbido, pus nunca le tocaba a el a ajudar la missa. L alma de l diabo de Antonho Pitorro, un mazmaruco grande i mal amanhado, malo cumo la sárnia, nunca le deixaba poner las unhas an la opa als outros garotos, yera siempre el solo a ansarilhar al redor de la saia de l cura.
Yera cumo an la cruzada: siempre l Pitorro cun la bandeira, la bandeira de la cruzada! Que proua ser home de la lhebar an la porciçon de la fiesta! L Pitorro arrebanhaba-la siempre, si le poderie dar bien beisicos ne l culo al cura i a las catequistas! Inda ua beç sou abó habie dezido mui sério:
- Peç-me que inda bou you a tener que cumbersar cun esse Pitorro!
Mas agora iba-se de biaige!
I yá se bie benir l cura, a saber de l abó, cun ls tius de las linternas i de la cruç i...bós nun quereis ber?!, peç que se le caiu l sangre als pies! Anton nun ye que delantre de l cura i de ls tius benie l Pitorro, gordo cumo un teixugo, parecie un pan-lebe sbarrundado, cun ua campanica an la mano. Anton yera l cunina que ancabeçaba la quemandita que benie por sou abó?!
L que ye de más tamien ye moléstia! Pousou l tarraço de Piloto i sentiu ls pelos a punéren-se-le de punta. Yá sou abó iba çcansado cul mazmárria de l Pitorro a rumper l camino!
Nun sabe cumo fizo, yá solo se biu delantre de l outro, culs punhos cerrados i ls tius i l cura parados a oulháren par’el!
Cunta l tiu de la cruç que le gaçpenhou de rumpon la campana de las manos a Pitorro i solo le dixo:
- Bota-me acá la squila, que hoije la fiesta ye de miu abó!
Alfredo Cameirão