Die 11 d’Agosto atrasado fizo-se an Ruolos, cunceilho de Mogadouro, l XI Ancuontro de Blogueiros de l Praino Mirandés i fui apersentado l lhibro “Caminhos de l Demonho”, un trabalho d’ambestigaçon subre l’eimigraçon a salto na Tierra de Miranda.
L die ampeçou por essas 8.00h de la manhana, culas buonas benidas al lhugar de Ruolos, dados pul Persidente de la Junta, José Pedro Amaro i pul mardomo de l Ancuontro, David Casimiro.
Antes que calcessa más, fui tiempo de meter pies a camino para besitar l sbarrulho dela capielha de San Fagundo, culs sous dous arcos inda de pies, un románico i outro gótico, l que quererá dezir que l templo haberá sido “puosto de pies” an tiempos çfrentes.
Tornando al lhugar de Ruolos, apuis dua passaige pula eigreija, fui altura de besitar las bodegas. Falamos de “foias” scabadas ne l chano - lhastra, na barreira de la lhinha d’auga, adonde fui splicado q’antigamente la gente de Ruolos guardarie l bino i alguas cousas de quemer. Eisistiran hoije inda más de binte bodegas ne l sítio que besitemos, alguas yá sbarrulhadas (las raizes de las carrasqueiras que médran porriba fáien-las sbarrulhar), mas alguas inda bien cunserbadas, cumo tal aqueilha adonde l’ouganizaçon oufreciu la merenda als partecipantes.
Apuis de l’almuorço, adonde partecipórun más de 130 pessonas – antre eilhas l senhor D. José Cordeiro, Bispo de Miranda-Bergáncia – fui tiempo de fazer l’apersentaçon de l lhibro “Caminhos de l Demonho”, un trabalho d’ambestigaçon subre l’eimigraçon “a salto” que houbo na Tierra de Miranda (hoije cunceilhos de Miranda l Douro i Mogadouro) ne l seclo passado, fazido an co-outorie de David Casimiro (nacido i criado an Ruolos) i l conhecido ator de la talbison pertuesa, Guilherme Filipe (antre outras personaiges menos populares, fui l ator que fizo l porsor Sapinho de la nobela Morangos Cun Açucre).
Stubo l salon de la Junta de Fraguesie acuquelhado de gente i na mesa de apersentaçon stubírun, para alhá de ls outores an que yá amentemos, l persidente de la Junta, ls persidentes de la Cámara de Miranda l Douro i Mogadouro, la bariadora de la cultira de la Cámara de Mogadouro i D. José, l nuosso Bispo, de a ar de muitas de las pessonas que partecipórun n’ambestigaçon, dambos dous lhados de la raia, Pertual i Spanha.
Stá de parabienes l mardomo pula fiesta que fizo i la gente que fui capaç d’ajuntar. Amporta dezir q’estes ancuontros yá se fazírun onze anhos, repartidos por bariados lhugares de la Tierra de Miranda, ls cunceilhos de Miranda l Douro i Mogadouro. L’eideia i l antuante de l purmeiro fui Alcides Meirinhos, an 2008 ne l Naso, adonde stubírun 12 partecipantes de blogues screbidos an mirandés, antre eilhes i a la cabeça Amadeu Ferreira.
L lhugar para 2019 yá stá treminado: será an Dues Eigreijas nun die d’Agosto de l anhos que ben. Alhá staremos, se nun houbir mal ou muorte.