Saudades de la mie tierra

Tamien corri pul mundo
Por isso you te deixei
Busquei cousa melhor
Mas you nun l’ancuntrei.

Hoije me stou a lhambrar
Cumo fui aquel die:
Cumo podie ancuntrar melhor
Se melhor que tu nun habie?!

Stou eiqui an Bumioso
Deiqui beio la tue sierra:
Assi mato las saudades
De la mie linda tierra.

Passo por ti a las bezes
I beio cun muito agrado
Cumo tu stás bonita
I l que tenes melhorado.

Beio tues rues tan lindas
Anté flores por todo l lhado
I l campo de las gamoneiras
Anté yá stá aplainado.

Si senhor, miu Palaçuolo,
Quantas cousas ten l fragués
Assi me pus a pensar
bolber para ti de beç.

Stragórun-te la Fuonte de las Lhatas
I nun beio qual la rezon
Ye ua cousa mal feita
Na mie oupenion.

Pido al Persidente de la Junta
Se me stubir a scuitar
Pra bolber a poner la fuonte
Ne l sou debido lhugar.

A la bezes bou a Pereiras
Rezar alhi a aquel santo
Aporbeito pra you ber
Las tues casas de l canto.

Tamien mato saudades
Cumo aquel que diç:
Assi you recordo
Ls tiempos que aí fui feliç.

Cun tanto melhoramento
Pra mie felcidade
Un die serás bila
Quien sabe se nun cidade.

Beio todo para melhor
Stou feliç de cuntente
Mando deiqui un abraço
Pra toda essa giente.

José António Esteves
Lar de S. José, Bumioso.