Pan i chouriça

L garoto guiaba-los, i serbie tamien para amolhecer ls coraçones más anteiriçados, a modos de más bien spipar la smola. I inda se tiraba de casa, menos ua boca a pedir pan!
La nuossa pareilha tamien andaba naquel fado yá quantá. L garoto delantre, a bater a las puortas, l missal bien studado – ua smolica por quien alhá teneis – i l ciego trás del a arrastrar la queiata i l peso de bibir. Fames cumo dies, atrecidos an las nuites de ambierno, lhargas cumo ls anhos malos, recalcinados pulas tardes de berano, al rechino de l sol, corrien ls pobicos todos de l praino sien se fazéren bielhos an niun.
Daqueilha beç la casa yera rica i dórun-le pan cun un cibo de chouriça. Dura i negra cumo la puonta de un cuorno de beche bien retrocido! Assi i todo, l garoto nun rejistiu. Mirou l cibico de chouriça, i la barriga, arrepassada, apegada a las costielhas, boziou-le que l bielho anté le podie fazer mal tanta fartura. Papou-la, cun dous muordos afregulhados, i dou-le l pan al ciego.
- Rapaç! El l pan peç que cheira a chouriça. Tu nun la haberies ambasado tu i a mi solo me dás l pan?!
- Ai Jasus Senhor! Tamien yera melhor! Más querie que se me tolhisse la mano!, çaçamelhou l garoto, burmeilho, pouco afeito a anganhar l parceiro. Mas nun le soubo tan bien nien se le angulhiu tan depriessa la çcunfiança de l outro cumo se le habie angulhido la chouriça.
Yá fuora de l pobo, l ciego ampeça a zbiar-se ancontra un sobreiro de la borda de l camino. Deixa-te ir, que yá bás a daprender a tener tan bun fairo!
L ciego antropeça nun rebolho i smouca-se ancontra l sobreiro!
- Ah, mal raistaparta, stropício de l diabo! Anton nisquiera tenes la halbelidade de me zbiar de ls sobreiros nun camino tan praino?!
- Bó! I antón bós fustes tan listo a cheirar-bos l pan a chouriça i nun bos cheirou l sobreiro a cortiça?!!

Alfredo Cameirão