Las marcas de l Natal

Ye por esso que un jornal nun puode traier testos mais amportantes do que estes. Tamien assi l Jornal Nordeste bai quedando ne l Natal destas mocicas i mocicos para toda la sue bida. Sei que muitos lo ban a guardar cumo buona lhembrácia, nun deixando que naide acenda l lhume cun el.
Todos estes testos stan arrepassados por tradiçones que bénen de l fondo de l tiempo i que estas mocicas i mocicos ampéçan a bibir zde que nácen. Para todos eilhes l Natal nun serie la mesma cousa sin essas tradiçones, pus son eilhas que tráien la marca de l Natal, que nunca le bai a squecer an to la sue bida. Ye assi que l teçtemunho de la cultura bai passando i rebibindo a cada anho i a cada nuoba giente.
Hai un tiempo bielho que s’acaba i un tiempo nuobo que ampeça. Ye essa la magie de l Natal, cumo se tornáramos al percípio de l mundo i todo podira ampeçar outra beç, mas ampeçar dreito, renobado, zbulhado, an que a todos mos ye dada outra oportunidade. Ye ua fuonte de sprança, an que l’auga nunca se puode acabar. Se dúbedas oubira, eiqui quédan estes testos de las moças i moços de las aulas de mirandés, traídos pul porsor Duarte Martins. Tamien por eilhes l mirandés i la cultura mirandeses cuntínan a tener ua ouportunidade renobada que se há de renobar a cada Natal i cada Anho Nuobo.
Un bun Natal para todos i que l Anho Nuobo mos traia fuorças para cuntinar a lhuitar pul que ye nuobo, anque benga yá de l fondo de l tiempo.
Amadeu Ferreira