Nien ls uossos l scápan

Ls cochinos grúnhen, grúnhen
Porque será la festança
Cumoquiera que nun sáben
Que manhana ye la matáncia.

Mirai la farra, mirai la farra
Juntou-se la criadaige
Ls cochinos ye que sáben
Que ye an sue houmenaige.

Cómen-se castanhas assadas
I bebe-se de l melhor bino
Ls cochinos ye que nun sáben
Cumo será l sou çtino.

Lhában-se todos ls cacharros
Porpara-se ls cortiços
Ls cochinos ye que nun sáben
Que ban a ser feitos an chouriços.

Ls homes jógan las cartas
Las ties amánhan la salgadeira
Ls cochinos nun sabien
Que iba a ser desta maneira.

Ls garotos stan alegres
L pai stá mui cuntente
Ls cochinos stan a ber
Que esta nuite ye difrente.

Cuitadicos de ls cochinos
Que stan stan quaije na maca
Pus ban a ber manhana
Que yá staran na staca.

Picadicos ls cochinos
Nas tripas ban a meté-los
Nin ls uossos le scápan
Que seran pra butelos.

José António Esteves
Lar de São José. Bumioso.