La Gameta

Astanho, an 2007, saliu, pul més de Agosto, la 4ª eidiçon de La Gameta. I ten benido a salir pul berano, por ser la fin de l anho letibo, fruito dun trabalho que se fui fazendo culs alunos durante un anho d’aulas. A bien dezir, La Gameta ye a mode dun lhibrico cun testos bariados i trabalhos de ls alunos de lhéngua i cultura mirandesa que frequéntan las aulas de mirandés ne ls Agrupamientos de Scuolas de Miranda i Sendin, ou anton yá tubírun aulas de mirandés. A par de la participaçon de ls alunos, tamien son publicados ne l lhibro La Gameta alguns testos de pessonas que fázen parte de la quemunidade scolar i d’outras que s’anteréssan pula lhéngua i cultura mirandesa. Poesies, cuontas, recuolhas de la lhiteratura oural i tradicional mirandesa, algues traduçones, anterbistas, zenhicos, son alguas de las matérias que podemos ancuntrar no lhibrico La Gameta. Assi el, cun esta giente, todos ls anhos bai medrando an quantidade i qualidade. Mas l maior prepósito de todos de La Gameta ye la dibulgaçon de la lhéngua mirandesa als mais nuobos i a todos aqueilhes a quien pouco ou nada chega desta lhéngua. Ye ua maneira de ls alunos íren daprendendo cun gusto a screbir i a falar mirandés, acabando por se tornáren eilhes nas figuras maiorales dun mundo adonde la sue scrita bai criando i abrindo als cachicos nuobos caminos amostrados eiqui neste lhibrico cul trabalho de la scrita, de l sentimiento i de l’eimaginaçon destes alunos.
Duarte M. M. Martins

Nota – Este testo nun l diç, mas ten que ser eiqui dezido: La Gameta fui ua eideia i ye ua criaçon de Duarte Martins, porsor de mirandés, salindo grácias al sou grande sfuorço i tamien eimaginaçon. Para alhá de ls testos de ls alunos i doutras pessonas, cumo se diç ne l testo, La Gameta ten benido a fazer salir a cada anho un cunjunto de mui amportantes antrebistas feitas por Duarte Martins i que ténen sido un decisibo cuntributo pa l coincimiento de amportantes atebidades yá zaparecidas ou a camino de zaparecer, ajudando tamien a coincer l bocabulairo liado a essas atebidades nas tierras adonde la anterbista fui feita. Por todo esso, La Gameta yá se custituiu, solo an quatro anhos, nun amportante marco de la cultura mirandesa. Por esse camino, Duarte Martins ten benido nun solo a passar la lhéngua i la cultura mirandesas als sou alunos, cumo a anterbenir acerca de la quemunidade, liando-la a la scuola. Assi, solo hai que desear que esta spriença cuntine i se zambuolba. Parabienes i bien haias, porsor Duarte.(Amadeu Ferreira)