Alunos chubírun al tabuado para apersentáren colóquio no Liceu de Miranda de l Douro.

L`antremés repersentado puls alunos ten l nome “Sturiano i Marcolfa” i ls cascos son atribuídos a Francisco Garrido Brandão, un screbidor popular de l seclo passado que era natural de Cérceno, eiqui bien acerquita de Miranda. L antremés ten ua curgidade, ye que las figuras fálan trés lhénguas antre eilhas: pertués, mirandés i galhego. Yá stais a ber cumo todo fui? Muito fado, muita risa, muito faladuro, matrimónios trocados, bino a canho cheno i muita borracheira, arrematando la cousa doutra maneira “ad mores ridendo castigandos”. Nun faltórun, cumo nun poderie de ser, l profeta i todas las figuras sien mos squecermos, de l tonto i de la merenda de l tonto. I que buona staba eilha. Se nun acreditais, perguntai-le ls alunos de l segundo ciclo!
L antremés “Sturiano i Marcolfa” fui apuis repersentado puls mesmos alunos l die dieç de Junho, ne l ouditório de la Cãmera Municipal de Miranda de l Douro . La cousa tamien corriu bien, ls alunos fúrun uns berdadeiros profissionales an todo aquilho que se puoda dezir. Naide cobraba belhetes a la antrada, fúrun ls alunos que l quejírun fazer de libré buntade i pena fui que, nesta cidade de Miranda, cun tanta cultura que hai, naide querga saber deilha para nada. Bálha-mos la pouca i buona giente qu`inda hai i bai aparecendo!
Parabienes finalistas, fustes uns balientes i cuntinai a sé-lo por donde furdes, por ende a fuora. Son estes ls deseios de l buosso amigo i porsor de lhéngua i cultura mirandesa…

Duarte M. M. Martins