Ls Lusíadas

67
«Porque, se you de rapinhas só bibisse,
Pirata ou de la pátria çterrado,
Cumo crês que tan loinge me benisse
Buscar assento ancógnito i apartado?
Por que spranças, ou por que anteresse
Benirie spurmentando l mar raibado,
Ls Antárticos frius i ls ardores
Que súfren de l Carneiro ls moradores?
68
«Se cun grandes oufiertas d' alta stima
L crédito me pides de l que digo,
You nun bin mais que a achar l stranho clima
Donde Natura puso tou Reino antigo;
Mas, se la Fertuna tanto me sublima,
Que you torne a la mie pátria i Reino amigo,
Anton berás l don soberbo i rico
Cun que mie tornada certifico.
69
«Se te parece inopinado feito
Que Rei da última Hespéria a ti me mande,
L coração sublime, l régio peito,
Nanhun caso possible tem por grande.
Bien parece que l nobre i gran cunceito
De l Lusitano sprito demande
Maior crédito i fé de mais alteza,
Que creia del tanta fortaleza.
70
«Sabe que hai muitos anhos que ls antigos
Reis nuossos firmemente aperponírun
De bencir ls trabalhos i peligros
Que siempre a grandes cousas se ouponírun;
I, çcubrindo ls mares einimigos
De l quieto çcanso, pertendírun
De saber que fin tenien i adonde stában
Las redadeiras praias que lhabában.

Traduçon de Fracisco Niebro