Ter, 19/06/2007 - 10:35
Tiu Alfredo i ls sous
Andában tranquilos a segar,
Ancuntrórun uns lhobicos,
Trazírun-los pa l lhugar.
Era ua niada mui grande,
Mas quien sabe ye Alfredo Jota.
You inda me lhembro de ls ber
A la puorta de tie Calota.
Culs perros todos a lhadrar,
Lhougo se ficou a saber:
Pa lça puorta de tie Calota
Corrimos todos pa ls ber.
You inda me lhembro bien,
Parece que ls stou a ber:
Inda mal tenien uolhos,
Mas yá mos querien morder.
Dezie mie prima Marigusta
Que tamien era pequeinha:
Cundanidos de ls lhobicos,
Yá se scónden na lheinha.
Mas sou armano Alfredo
Cortou-le la retirada
I ls puso a drumir
Cua sola cacetada.
Mas la mai de ls lhobicos,
Ua lhoba fanchonaça,
Andubo puli a buscar
Quien fizo aqueilha zgraça.
I quien la biu por eilhi
Dezie que daba pena de la ber,
Mas quien le tirou ls filhos
Eilha nun ficou a saber.
Ua beç, tiu Zé Sabino
Biu-la a cheirar l sou caçuolo.
Todo isto acunteciu
No lhugar de Palaçuolo.
José António Esteves
Lar de S. José, Bumioso
