Sin bezerreiro nun hai çapatos

Ls bezerreiros i peleiros andában d’aldé an aldé, an riba de sue mula, a cumprar pieles de canhonas i a bender suola i bezerro para fazer çapatos, botas i cholas. Tie Angrácia, essa, cuitada, nun tenie perjunçon, só calçaba çapatos feitos pul tiu Barnabé, çapateiro de l’aldé. Eilha yá tenie las gáçpias de ls sous çapatos mi rafadas i stában quaije rotos cun l trote que le habie dado, a todos ls dies. Querie chamar l çapateiro i nun habie meio d’aparecer puli l bezerreiro para cumprar l bezerro i la suola. Por bias disso, yá andaba anrezinada i cunsumida, dando buoltas a la sue cabeça i perguntou-le al sou tiu:
- Á Calros, tu nun tenes bisto por ende l tiu Zé bezerreiro?
- Yá quantá que nun l beio porqui, que le tenerie acuntecido?
- Á home de Dius, bira pr’alhá essa boca!...Stá eiqui, nun tarda ende an aparecer! Se nun aparecir deiqui por uns dies, quedamos çcalços.
- Tenemos que star cun atento, nun baia el a benir i nun dar-mos pula sue cuonta, acrecentou tie Angrácia, meio zacaçuada de la bida.
Soutordie a la purmanhana cedo, alhá benie el an riba de sue mula, cubierta de pieles i cun las alforjas scucidas para un lhado, chenas de bezerro i de suola, anrolados. Pára a la frente de las scaleiras de tie Angrácia i bózia:
- Olha as peles!...Olha as peles!... Oh da casa!...Há boa sola e bom bezerro!...
Tie Angrácia yá smorecida, sin saber l rumo que habie de tomar de sue bida, bondou oubiu la boç de l bezerreiro i la sue alma sunriu d’alegrie. Abriu l postigo, puxou pul ferroilho de la puorta, fui-se a tener cun el i dixo-le:
- Bunos uolhos bos béian!... Yá uns dies que bos speraba. Ls mius çapatos yá píden outros nuobos, i sin suola i bezerro l çapateiro nun me ls fai.
Tie Angrácia cumprou un rolo de cada cousa, antrou an casa, strobiçou-los lhougo eili a l’antrada de la puorta, na preça de casa, i naquel miesmo eistante saliu zatinada a chamar l çapateiro para treminar ls dies que habie d’ir a trabalhar para sue casa. La casa de l çapateiro era n’outra punta de l lhugar, mas eilha an trés tiempos puso-se alhá i dixo-le:
- Tiu Barnabé, percisamos muito de bós. Pa la sumana, sin falta, quiero-bos an mie casa, senó tengo que chamar un çapateiro de fuora.
- Pus bien!… Se teneis assi tanta priessa, alhá me tenereis ne l purmeiro die de la sumana.
Quando tie Angrácia bolbiu a casa, l sou tiu staba na cozina al redor de l lhume a calcer ls pies i a anxugar ls miotes, ouserbando un de ls sous çapatos, que tenie na mano, i eilha dixo-le assi:
- Pala sumana tenemos çapateiro!...
- Yá nun ye sin tiempo, yá podie benir hoije! Olha la boca que stá eiqui a assomar-se ne l miu çapato!...
A la purmanha bien cedo, ne l die cumbinado, l tiu Barnabé alhá staba cun todos ls cunferrumes neçairos, strobiçados a las scaleiras de tie Angrácia: mesa, formas de madeira de bários númaros, martielho, truquesas, nabalhas, brochas, oulhós, subela, ariestras, filo de çapateiro, peç, sedas de pelo de cochino… Anquanto s’ouganizaba para ampeçar l serbiço, tie Angrácia purparaba l zayuno adonde nun faltaba ua buona fogaça, uas rodielhas de chouriço, la bota cul bino, adonde ponie todo anriba la mesa de trabalho i eili quemie. Sentado nun talho de trés pies, quedaba todo l die martelhando, cosendo de manzeiras nas manos i de mandil puosto. El ganhaba la jeira al die, ancluindo las refeiçones, andependientemiente de ls çapatos que fazisse. Ampeçaba por chafurgar l bezerro i la suola nun lhato d’auga para quedáren dóndios. Nesse antretiempo, tiraba las medidas de ls pies de las pessonas a quien l’iba a fazer ls çapatos. Pegaba nua tauga, medie, talhaba i cortaba ls muoldes de las biqueiras, de las gáçpias, de ls talones, las palmilhas i las suolas de ls çapatos. Cosie todas las pieças uas a las outras i, cun l’ajuda dua forma, ls çapatos íban temando l sou formato, apuis de l bezerro bien sticado i assegurado a la forma de madeira cun ariestas. Adepuis de la proba, apegaba las sedas de pelo de cochino nas puntas de l filo de çapateiro, cun peç pra antrar bien ne ls buracos de la subela. Portegie las manos cun las manzeiras, aonde anroscaba l filo ountado cun peç, para fazer bien fuorça i ls puntos quedáren bien apertados a la suola. Ls çapatos éran para trote, tenien que quedar rejistentes i aguantar ls caminos trilhados cun tierra, arenas, calhaus, lhodo... Para isso, l çapateiro spetaba brochas nas suolas por baixo de las biqueiras i l carcanhal de l çapato. Eilhes íban a ser pan para toda la colher, rejistien a la calor, al friu, la chuiba ... Cumo nun habie outros, andában siempre ne ls pies anté acabar, solo se calçában ls de calfe ne ls dies de fiesta. Isso era para quien ls tenie!... I que proua tenien las pessonas cun eilhes!...
Quantas bezes ls pies crecien i ls çapatos apertában i habie que ls aguantar porque nun habie outros sequiera para çcansar ls pies!...
Alcina Pires