L tiu spierto

- Ah Antonho, tenes que ir a la feira a cumprar un lharego.
Era ne l més de Janeiro i l tiu Antonho bestiu la çamarra i alhá bai el a la feira. Cumprou un cochinico, arranjou ua barica i bai de tanher l cochinico. Quando iba a meicamino, l cochino zourientou-se, ampeçou a fugir por aqueilhas tierras afuora i nunca mais l biu. Chegou a casa i cuntou-le a la tie l que se habie passado. La tie, mui anraibada, dixo-le:
- Ah Antonho, si sós bien burro! L cochino ata-se cun ua cordica al cachaço i trai-se de rede!
Noutro die de feira, la tie dixo-le al tiu:
- Antonho, tenes que ir a la feira a cumprar un cántaro.
L tiu Antonho lhembrou-se de l que la tie le habie dezido. Cumprou l cántaro i atou-lo cun ua cordica a l’asa i bai de puxar. Quando chegou a casa yá solo lhebaba l’asa. Agora nun sei l que se haberá passado cun eilhes dous.

Etelvina Antão