L galho que se deixou drumir

Solo alguas de las pitas achában grácia a aquel cantar, inda cun las streilhas ne l cielo.
L cochino spertaba siempre de mala cara, i un die dixo-le al galho:
- Se gustas tanto de cantar, porque nun fazes ua fiesta?
I nun ye que l galho ficou a pensar nesso? Las pitas cuncurdórun, i ampeçórun a purparar la fiesta. Treminórun l die, i fazírun la lista de ls cumbidados. Eirien todos: l coneilho, l perro, la palomba, la baca, l cabalho, l parro i, claro, ls duonhos da la fiesta, l galho i las pitas. L cochino i l burro, esses nun eirien.
- Nun poude ser, dixo l perro. Tenemos que ir todos ou, anton, nun hai fiesta.
- Ah!... Mas l cochino nun se lhaba i cheira mal. I l burro nun sabe beilar.
- Tenemos que ir todos, arrespundírun ls outros.
- Stá bien, cuncordou l galho yá cun la crista mais baixa.
Fui mui debertida la fiesta. L cochino apareciu bien lhabado i l burro bien screnchado que, al fin, tamien sabie beilar. La fiesta demorou-se i acabou bien tarde, tan tarde que soutordie todos inda drumien yá l sol iba alto, porque, pula purmeira beç, l galho habie-se deixado drumir.
Válter Deusdado