Ua raposa cumo un bui

- Mirai, pai, soutordie bi ua raposa que era tan grande cumo l nuosso bui.
L tiu, quando oubiu ua mintira tan talhuda, oulhou pa l garoto de sgueilha i pensou ‘cumo son ls garotos... Dízen l que le ben a la cabeça’.
Fúrun caminando i l tiu pensou: ‘Nun bou a deixar la cousa an claro. Yá te bou a cuntar ua, para ampeçares a daprender a tener tino!’:
- Olha filho, nós bamos cun las bacas pa l cerrado de Ourrieta Ferreiro i tenemos que passar pula puonte de ls mintirosos.
L garoto, que scuitaba todo mui listo, fizo lhougo ua sclamaçon:
- Bós dezistes, de ls mintirosos?
- Si! Diç la lhienda que siempre que passa por alhá un, abre-se un buraco i cai-se pa l rigueiro.
Seguírun sou camino i bai l garoto:
- Pai?
- Quei?
- La raposa que you bi nun era bien cumo l nuosso bui, mas si cumo l nuosso burro.
- Stá bien, you yá antendi.
Cuntinórun camino arriba i chegórun a la tan afamada puonte. L home passou pa l outro lhado i qual nun fui l spanto del, puis yá se le habie squecido la cuonta de la raposa, al ber l garoto stancado a l’antrada de la puonte.
- Anton, benes ou nun benes? dixo-le l pai.
- Ah pai, la raposa que you bi era armana a las outras raposas.
- Stá bien puodes passar.
De l outro lhado de la puonte, l home abanaba la cabeça, marmurando, ‘Que te sirba d’eimenda pa la tue bida’.

Natália Antão