Un die de Eimbierno ou L Capote

L casco de la pieça Um dia de Inverno ou o Capote ye atribuído a un eilustre mirandés de Bilasseco que ten por nome Basílio. Este screbidor, que tamien era carpinteiro, fui l outor de outros cascos, cumo ye l caso de A pintura de São Braz.
La pieça ye ua comédia an lhéngua pertuesa que anda al redor dun capote que fui perdido por Pitágoras, un rapaç a quien la cabeça pouco le pesaba. Barnabé até cuidou que fússen alguns lhadrones a roubar l capote l filho. L pobo entra nun rebulhiço cumo nunca se bira i cada un fai la sue parte. Lucrécia, que era la mai de Pitágoras, agasta-se an rezas, ouraçones, pormessas na eigreija para que l bendito capote aparecisse. La mulhier até botaba sangre de ls zinolhos de tanta rezadura pul capote. Barnabé, ajudado por Crespim, fai un eisército cun algue giente para ancuntrar ls bandoleiros que habien roubado l capote. L eisército esse, tamien tenie muito que se le dezisse, el era cada un…Corrírun todo a saber de l capote i nada, nun habie modos an aparecer. Nien na taberna alhá staba… Por fin, l capote alhá apareciu, apuis dua cumbersa de Pitágoras i Leopoldo. Pus tenie-lo Leopoldo que lo achou i serbiu-se del pa einamorar Filomena i apuis tapar ls filhos, Roberto i Vitória. Todo acaba bien i l capote regressa al amo.
L outor deste antremés mostra-se un bun coincedor de las realidades i bibéncias de las gientes de l campo destas tierras. L que eiqui bai, poderie mi bien haber-se passado an qualquiera aldé deste rincon de Miranda.
Mas cuido que l mais amportante disto todo ye que la giente de Malhadas ten-se tubido na raiç i mantenido cun muito gusto la tradiçon que hardou an repersentar quelóquios. Apesar de haber pouco tiempo pa l ansaio, todo corriu bien. Deixo-bos l nome de las pessonas que participórun neste quelóquio i aquilho que eilhas fazírun:
Colaboradores, Victor Córdova, Rafael Igreja; Apersentador, Domingos Raposo; Regrador, Albino Alonso; Profecie José Sebastião; Tonto ou Gracioso, Licínio Pires; Crespim, Esmeraldino Fernandes; Pitágoras, Elton Igreja; Lucrécia, Cláudia Fernandes; Barnabé, Ezequiel Pires; Leopoldo, Duarte Martins; Filomena, Andreia Ortega; Roberto, José Luís Afonso; Vitória, Sara Afonso; Taberneiro, Francisco Pires; Carlota, Elisa Pires; Januário, Paulo Gonçalves; Serafina, Soraia Igreja; Sultão, Diamantino Alves; Figurantes; Paulo Neto i Serafim Jordão. Na música, al acordeon, Rui Gonçalo; al bombo, Miguel Ortega; a la caixa, Tibério Ventura i a la gaita de fuolhes, André Alonso.