Quando miro para trás

Mas la bida ye anganhadora
digo-bos you cumpanheiros
i nun sou de ls purmeiros
que a esta bida amplora
a quien tanto la adora
dá tristeza por smola
inda me lhembra la scola
recuordo hoije mui triste
aqueilha alegrie yá nun eisiste
de ls tiempos de la scola.

Sien you me apercebir
la mocidade fugiu de mi(n)
deixou quedar por fin
sien you la poder bibir.
Anté me custa a crer
inda onte la festejaba
pensando que nun acababa
la cúrtia mocidade
beio hoije cun esta eidade
l bien que eilhi se staba.

Mas la bida nun adrumece
i seguiu por eilhi fuora
chegando assi esta hora
onde todo me acuntece
yá ye hora que comece
a fazer doutra maneira
passar la mie bida anteira
quaije sien la sentir
siempre de mi a fugir
esta bida traiçoeira.

Passei puls binte anhos
isso fui yá muito tiempo
Hoije digo
cun sous modos stranhos
houbo puis alguns anganhos
de ls trinta als quarenta
bida que tanto m’atenta,
solo fai l que eilha quier
tube que me cumbencir
que fui un grande pateta.

Fúrun-se ls anhos trinta
que fui mais cumplicado
nun staba habituado
a que la bida me minta
sin aporbeitar nada
stou de bota calçada
pa l que dir i benir
yá sei l que ye sufrir
yá nun me falta nada.

António José Esteves
Lar de São José. Bumioso.