Ter, 13/03/2007 - 16:07
Pula altura de las bindimas, dous garotos que andában culas bacas, fúrun-se a roubar uas ubas nua binha dun tiu cun fama de poucos amigos!
Por mala suorte, l tiu andaba pali a la caça, biu benir ls rapazes i scundiu-se atrás dua parede. Quando ls garotos stában cula mano nas ubas, l tiu alhebanta-se, apunta la spingarda para eilhes i diç-le:
- Quien ben a roubar a la mie binha, nun sale dacá cun bida! Agora bós ye que sabeis: quereis morrer parados ó a fujir?
- A fujir. Respónden ls garotos mui assustados.
Quando yá íban a correr cun to las sues fuorças, l tiu dou dous tiros pa l aire i ls garotos cul susto, caírun un al lhado de l outro, cula barriga ne l suolo. Passado un cachico hai un que alhebanta la cabeça i pergunta pa l outro:
- Ah Antonho, nós staremos muortos ó bibos?
Cuntada por Fertunato Preto. Recuolha de Carlos Ferreira