Ls Reis Magos

L´orde anternacional staba amanaçada, i habie que fazer algo para que l Mundo cuntinasse cumo até eili, sin subressaltos.
Anton ajuntórun-se ls puderosos i mandoran a Belen ls sous ambaixadores, a que le chamórun Reis Magos, porque lhebában l recado de fazer l milagre de mantener todo armano. Bieno un de l’América, Gaspar, outro d’África, Belchior i outro de l’Ouropa, Baltesar. Todos seguien la streilha d’alba, que era la que relhuzie mais.
Agora ls homes passaban a ser todos armanos? Acababa-se la porpiadade pribada, haberie solo un rei pa l Mundo, i todos tenien que se rendir a este nuobo Rei?
Era la repuosta a estas preguntas que eilhes íban eili a saber. Bieno l represantante de Belen a saber se querien falar todos trés, ou un de cada beç, i quien serie l purmeiro. Lhougo eili nun s’antandirun i tubírun que botar suortes para treminar l lhugar an que cada un antrarie pa la oudiença. Calhou-le a Baltesar a ser l purmeiro, que tardou por ende ua hora. Saliu de cabeça baixa i nun dixo nada, que solo falarie quando ls outros fússen oubidos tamien. Apuis, ls trés arrespunderien a todas las preguntas que quejíssen. L redadeiro a chegar fui Belchior, i traie ua cara de pasmado, i nun cunseguie çfraçar l’admiraçon.
- Anton este Rei, inda agora naciu i ya quier mandar? Yá stou arrepandido de haber benido acá.
Ls trés resulbírun lhougo eili, que nada demudarien i, se fusse neçairo, anté se ajuntában para cunspirar.
Quando quejírun tornar pa las sues tierras, bírunn que nun habie streilhas, i que staba todo mui scuro. Ende, antandírun lhougo de l que se trataba: aquel nino era berdadeiramente l Rei, que habie sido purmetido hai yá muito tiempo. Tornórun atrás i declaroran eili que eirien a demudar. Las streilhas ponírun-se outra beç no sou lhugar, i la lhuç tornou a aparcer.
Zde ende, todos ls anhos ls Reis Magos ténen que bolber a Belen para que ls homes nun se squeçan de la pormessa que fazírun, de demudar l Mundo. Ye por esso que, passados tantos anhos, inda hoije ls Reis Magos fázen esta biaje, para que l Mundo nun pare de demudar, para combencer a todos ls homes a acraditar nun nuobo Rei, que faga l milagre de la paç.
Válter Deusdado