LS LUSÍADAS

21
«Mira aquel cumo abaixa pula lhança,
Cun cabeças de quien de bela habie,
Ende la trama sconde, cun que alcança
La cidade, por manhas i ousadies.
Eilha por armas ten l’acumparança
De l cabalheiro que cabeças fries
Na mano lhieba (feito nunca feito!):
Giraldo Sien Pabor ye l fuorte peito.
22
«Nun bés un Castelhano, que, anraibado
Cun Fonso nono, Rei, por ódio antigo
De ls de Lara, pa ls Mouros stá passado,
De Pertual fazendo-se einimigo?
Abrantes bila toma, acumpanhado
D’Anfieles que trai pa mais peligro;
Mas bei que un Pertués cun pouca giente
L zbarata i apuis prende facelmente.
23
«Martin Lopeç se chama l cabalheiro
Que destes lhebar puode palma i lhouro.
Mas mira un cura yá feito guerreiro,
Que an lhança de aço buolbe choupa d’ouro.
Bei-lo, antre ls medrancados, tan anteiro
An nun negar batalha al brabo Mouro;
Mira ne l Cielo seinha que aparece
I que ne ls poucos sous l sfuorço crece.
24
«Mira, ban ls Reis de Córdoba i Sebilha
Derrotados cun dous, i nó de spaço;
Derrotados? Ban muortos: marabilha
Feita de Dius, que nó de houmano braço.
Bés? La bila de Alcácere se houmilda,
Sien le baler defénsia ou muro de aço,
A Don Mateus, l Bispo de Lisbona,
Que corona de palma sue corona.
25
«Mira un Mestre que abaixa de Castielha,
Pertués de naçon, cumo cunquista
La tierra de ls Algarbes, i yá neilha
Nun acha que por armas le rejista.
Cun manha, sfuorço i cun benina streilha,
Bilas, castielhos, toma a la sue bista.
Bés Tabira agarrada als moradores,
An bingança de ls siete caçadores?
Traduçon de Fracisco Niebro