Ter, 03/04/2007 - 10:15
17
Ye Don Fuas Roupinho, que na tierra
Cumo ne l mar relhumbra juntamente,
Cul fuogo que acendiu an pie la sierra
De Ábila, an galeras de Moura gente.
Mira cumo, an tan justa i santa guerra,
Por se morrer lhuitando stá cuntente.
De las manos de ls Mouros feliç l’alma
Passa al Cielo an triunfo, justa palma.
18
«Nun bés ende un juntouro, de strangeiro
Traijo, salir d’la grande armada nuoba,
Que ajuda a cumbater l Rei purmeiro
A Lisboua, del dando santa pruoba?
Mira Anrique, afamado cabalheiro,
Que an pie la foia nace palma nuoba.
Por eilhes mostra Dius milagre bisto;
Son Germanos ls Márteles de Cristo.
19
«Un Saçardote bei, cula sue spada
Contra Arronxes, que toma, por bingança
De Leiria, que habie sido tomada
Por quien por Maomé deten la lhança:
Ye Teotónio Prior. Mira circada
Santaren, i berás la sigurança
D’la figura ne ls muros que, purmeira
Chubindo, oupiu de Quinas la bandeira.
20
«Mira-lo, donde Çáncio eiqui zbarata
Ls Mouros de Bandália an dura guerra;
Rumpendo ls einimigos, l alferç mata
I l pendon sebilhano bota a tierra:
Men Moniç ye, que nel balor retrata
Que la foia de l pai culs uossos cerra.
Dino destas bandeiras, pus sien falta
La cuntrária derriba i sue pon alta.
Traduçon de Fracisco Niebro