LS LUSÍADAS

42
Assi cuntaba l Mouro; mas andando
Grande fama iba yá pula cidade
De benir esta giente stranha, quando
L Rei saber mandaba la berdade.
Yá benien pulas rugas caminando,
Rodeados de todo sexo i eidade,
Maiorales que l Rei buscar mandara
Capitan de l’armada que chegara.
43
Mas el, que de l Rei ten yá la licença
Para zambarcar, bien acumpanhado
De ls nobres Pertueses, cun ourgença
Se bai, cun ricos panhos anfeitado.
De quelores tan fermosa defrença
Inche ls uolhos al pobo alborotado;
L remo cumpassado fire friu
Purmeiro l mar, apuis l fresco riu.
44
Na praia un maioral de l Reino staba
Que, an lhéngua deilhes, «Catual» se chama,
Rodeado de Naires, que speraba
C’ua fiesta d’arromba l nobre Gama.
Yá an tierra, ne ls braços l lhebaba
I nun andor bai ua rica cama
L’ouferece para ir (questume ousado),
Que puls homes als ombros ye lhebado.
45
Assi l Malabar i tamien l Luso
Camínan para adonde l spera l Rei;
Ls outros Pertueses ban al uso
Que l’anfantarie sigue, bien delei
L pobo que eilhi cuorre bai cunfuso
De ber la giente stranha, mas nun bei
Que preguntar; ne l tiempo yá passado,
Na Torre de Babel le fui bedado.
46
L Gama i l Catual íban falando
Nas cousas que mais bien le parecie;
Monçaide, antr'eilhes, bai antrepretando
Las palabras que a dambos antendie.
Assi pula cidade caminando,
Adonde lhebantado eilhi se bie
Un riquíssemo templo yá chegában,
Pulas portas de l qual juntos antrában.
Traduçon de Fracisco Niebro