LS LUSÍADAS

53
«Benirá ‘puis Meneses, an que l fierro
Mais na África, que acá, haberá probado;
Castigará de Ourmuz sobérbia l erro,
Cun le fazer tributo dar drobado.
Tamien tu, Gama, an pagas desse çterro
An que stás i serás inda ambiado,
Benirás cumo Conde i d’ honras grandes
Pa la tierra çcubierta an que tu mandes.
54
«Mas aqueilha mui cierta necidade
De que naide se scapa de sous danhos,
Cun rial eilustrado denidade,
Te sacará de l mundo i sous anganhos.
Outro Meneses lhougo, an que l’eidade
Mais grande na prudéncia que ne ls anhos,
Gobernará; i dará l ditoso Anrique
Que perpeta lhembráncia del mos fique.
55
«Nun solo bincerá als Malabares,
Arrasando a Panane cun Coulete,
Atacando bumbardas, que, pu ls aires,
Se bíngan só de l peito que arremete;
Mas cun bertudes, cierto, singulares,
Enemigos de l’alma bince ls siete;
A la codícia ganha i ancuntinéncia,
Que an tal eidade ye grande eiceléncia.
56
«Mas, despuis que las streilhas l chamáren,
Sucederás, á Mascarenhas fuorte;
I, se anjustos l mando te roubáren,
La fama tenerás lhibre de muorte.
Para tous einimigos cunfessáren
Tou balor alto, porque quier la suorte
Que mandes, mais de palmas coronado,
Que de fertuna justa acumpanhado.
57
«Ne l reino de Bintan, que tantos danhos
Tenerá a Malaca muito feitos,
Nun só die las anjúrias de mil anhos
Bingarás, cul balor de eilustres peitos.
Einumanos trabalhos, mil anganhos,
De fierro abrolhos mil, i passos streitos,
Paredes, baluartes, lhanças, setas:
Todo digo que rompas i sumetas.

Traduçon de Fracisco Niebro