Ter, 11/12/2007 - 11:31
74
Cumo de l caçador perro atrebido,
Afeito a agarrar n'auga abe ferida,
Bendo de la spingarda l canho oupido
Pa la garça ou la parra conhecida,
Antes que sone l stouro, nien sentido,
Salta n'auga i de caça nun dubida,
Caínca i bai nadando: assi l mancebo
Cuorre a la que nun era armana a Febo.
75
Leonardo, suldado mui bien çpuosto,
Manhoso, cabalheiro i namorado,
A quien Amor nun dira un solo zgusto
Mas siempre fura del mui mal tratado,
I tenie yá por firme persupuosto
Ser cun amores mal afertunado,
Mas pa que nun perdisse la sue sprança
De inda poder sou fado haber mudança,
76
Quijo eiqui sue bintura que corrie
Atrás Eifire, eisemplo de beleza,
Pus mais caro do que outras dar querie
L que dou, para dar-se, natureza.
Yá cansado, correndo, le dizie:
– «Ah fermosura andina de brabeza,
Pus desta bida you te dou la palma,
Aspera un cuorpo a quien le lhiebas l'alma!
77
«Todas de fugir cánsan, Ninfa pura,
Rendindo-se a la gana de l einemigo;
Solo tu de mi fuges na spessura?
Quien te dixo que sou you que te sigo?
Se te l ten dito yá aqueilha bintura
Que an to la parte siempre anda cumigo,
Nun acradites, que, s'acraditaba,
Mil bezes a cada hora m'anganhaba.
Traduçon de Fracisco Niebro