LS LUSÍADAS

58
Ls bienes que Pomona dá, Natura
Eilhi produç, deferentes ne ls sabores,
Sin percison tener d’agricultura,
Que sin eilha se dan muito melhores:
Las cereijas, purpúreas na pintura,
I las moras, que l nome han d’amores,
L fruito que de Pérsia ben, mais cheno
I bien melhor criado an suolo alheno;
59
Abre la meligrana, de burmeilha
Quelor, cun que, rubi, tue grácia perdes;
Antre ls galhos de l uolmo, sin pareilha,
Dá la bide ubas tintas i outras berdes;
Bós, peras garrafales, pa naqueilha
Arble dariega bien bos mantenerdes,
Antregai-bos al danho que culs bicos
An bós fázen, cun fame, ls paixaricos.
60
Pus la tapeçarie tan guapa i fina
Stendida pul terreno inda brabiu,
Faç ser la de Aqueménia menos dina,
Mais ameroso l balhe selumbriu.
La frol Cifísia sue cabeça anclina
Subre l tanque de lhuç sereno i friu ;
Florece l filho i nieto de Ciniras,
Por quien tu, Diusa Páfia, inda suspiras.
61
Para julgar, defícel cousa fura,
L cielo i tierra armanos nas quelores,
Se a las flores l’Ourora dá tintura,
Ou se a eilha la dan las guapas flores.
Flora i Zéfiro tínhen fermosura
An bioletas quelor de ls amadores,
L lírio roixo i guapa, fresca rosa,
Ne l rostro de la moça, tan mimosa;
62
L’alba çucena lhágrimas chorando
De la fresca ourbalheira, i majarona;
Letras na frol jacintos berdegando,
Tanto al gusto de l filho de Latona.
An fruita i campaninas zafiando
Bei-se bien que stá Clóris a Pomona.
Bólan abes pul aire i ban cantando,
Ándan l suolo animales alegrando.

Traduçon de Fracisco Niebro