La muorte de l bruxo

Seguindo l sprito comunitário de ls pobicos mirandeses, ls bezinos que de beç an quando ajudában essas armanas a fazer ls trabalhos mais duros de la sega de la yerba i de l pan i nas bandimas, çcubrírun que ne ls terrenos deilhas siempre que ls dies tenien lhuna clara aparecie muito feno i pan que habie sido segado de nuite. Por muitos anhos las armanas Zeimilha i Cameirona cuntában que tenien un bruxo dua aldé mui acerca que fazie muito trabalho para eilhas, an special nas nuites de lhunar. Ls bezinos nun acraditában i andában mui acupados an saber quien era l bruxo tan amigo de ajudar, solo de nuite i solo essas armanas. I cun la raiba i l’ambeija de nun ls ajudar tamien a eilhes, resolbírun matá-lo. Assi acunteciu i nua daqueilhas nuites cun menos claridade l bruxo apareciu muorto. Adepuis de l antierro las armanas dezírun l segredo que habie sido guardado por muitos anhos: l bruxo era l armano mais bielho dua família de siete filhos, que habie ido pa la tropa quando ampeçou la guerra an Angola. Para nun ir pa la guerra, resolbiu zertar de la bida militar i l pai, cun miedo de las outoridades, spalhou l boato de que habie zaparecido i, se calha, habie-se morrido na guerra i naide lo habie çcubierto. Pa l mantener scundido, cumprou-le a las dues armanas Zeimilha i Cameirona la dita casa i alguas tierras, ne l pequeinho pobico de la Quinta de las Canhonas i mantubírun-lo cumo um preso, que drumi de die i trabalhaba de nuite. Apuis que l matórun, eilhas nun rejistírun a mantener l segredo i resolbírun antregar al caso a la justícia.
Leonardo Antão