La baca Cordeira

Un die, quando la baca passou pul lhugar a baixo, botórun-lhe malo oulhado i quedou mui malica. Cheiraba l quemer, oulhaba-lo mas nun lo quemie. Cordeira yá nun iba cun las outras bacas, num quemie nien andaba. Perdie peso de die para die, até que al fin dua semana la duonha lhembrou-se de ir a ber se la baca tenie malo oulhado. Quando la duonha chegou a la tie Guilhermina, ua benzedeira de Bilasseco que bie l malo oulhado, esta puso meia malga d’auga, l’azeiteira al pie, beneziu-se i ampeçou a fazer la sue ouraçon. Apuis disto, botou trés pingos d’azeite na auga i l’azeite zapareciu. Al fin de trés dies de la tie benzedeira fazer la reza para curar l malo oulhado de l animal, la baca Cordeira ampeçou a comer i puso-se tan buona que la próssima cria que pariu, saliu un bui que era tan bien raçado que fui de ls melhores buis de l Nordeste Trasmuntano. Yá naquel tiempo, ne ls anhos 70, l animal fui bendido por ciento i binte contos (ou cumo se diç hoije 600 ouros).
Inda hoije mie mai, ua mulhier de quaije 50 anhos, se lhembra de que le dixo la tie Guilhermina. La benzedeira habie dezido que se eilha nun tubisse ido alhá la baca se morrie an poucos dies! I la berdade ye qe la baca se curou mesmo. You solo penso que l malo oulhado ye algo que nun se bei, mas que lo hai, hai!
Neuza Fernandes