L lhion, l lhobo i l beche

Del dependie la paç i l’armonie, que muita beç fui ampuosta de carranca i screinha arrepelada. Sendo l xefe, nun se podie ir de bacanças sien ancuntrar un sustituto que quedasse na praça del. Pus s’assi nun fusse todo podie birar ua zorde ou até, quien sabe, dende benir ua guerra bien animalada. Cousa que el nun querie por nada deste mundo. Tenie que ancuntrar alguien que quedasse an sou lhugar, que benisse a acupar l sou cadeiron anquanto el andubisse por fuora. I deixar l mando, habie de ser an buonas manos. Çpuis duns dies de muita cisma, decidiu-se que fusse l beche, puis tenie ua buona cornadura i anté amponie uas barbichas ambaixo de la queixada, assi a modos de fidalgo. Chamou-lo i dixo-le:
- Agora quedas tu an miu lhugar, anquando you stubir fuora sós tu quien manda. Ampon l respeito, manten to l mundo na carreira, a ber se naide pon l pie an galho berde.
L beche lhougo que se biu ambestido i cun tamanhos poderes tratou lhougo de cobrar uas cuontas atrasadas que tenie cul lhobo. Este yá alguas bezes se habie armado an çafardanas cun el. Tratou de quedar d’atalaia. I nun fui perciso muito, ende l biu campante de la bida, meio znudo, na marmelada i de beç anquando uns rebolcos na sue lhoba, nua tardica na beiga de l Rodilhon. Nua sien bergonha i çaramento porqui nunca bistos. L beche pensou lhougo, agora ye que las lhiebas. Arrimou-se a el i, mesmo delantre de la cumbersada, nun las forrou, arreou-le uas balientes lhambadas. I siempre que l agarraba fuora de stribeiras, arriaba-le fuorte i feio. Tanto que yá andaba todo scalabrado i çcaçuado de la bida.
L lhobo sien saber cumo se lhibrar deilhas, fui-se a fazer queixinhas al lhion. L lhion animou-lo i treminou a tener ua cumbersa cul beche. Quando ancuontrou l beche dixo-le:
- Nun batas tanto ne l çcanzinado de l lhobo, el si ye un bardinaço mas fai la cousa mais de mansico, a ber s’el toma tino i se nun se mos muorre.
L beche birou-se pa l lhion i apercurou-le:
- Anton l que fago?
- Mira, fai assi: tu pides-le para el te traier ua bota de bino.
- I s’el la trai!?
- Buono, s’el benir cua bota de bino tinto tu arreias-le, que queries branco. Se benir cua bota de bino branco, tu arreias-le dezindo que queries tinto.

Faustino Antão