L caçador de parros

I si era bien berdade, tierras cumo estas arrimadas a la Quinta de Réfica nun hai armanas para quien gusta de caçar. Iba a ser un die an cheno, puis bien percisaba botar acá para fuora todo l cansáncio de dies encerrado i atafunhado an papelada ne l sou scritório ne l Porto adonde siempre trabalhou i bibiu.
Apertou las correias de las cartucheiras i fizo-se al restroilho. Lhougo ne l purmeiro çparo botou abaixo un parro brabo, que fui a caier drento de la cortina de l poço, adonde stában sumbradas patatas, i tamien medrában por ende uas buonas lheiras de antramoços i garbanços. Botou la scopeta a las cuostas i porparaba-se para saltar, quando l quinteiro de Réfica le boziou:
- Ei home, bós nun podeis saltar pa la cortina!
- Esso ye l que bós dezis. Matei l parro, tengo dreito de l’agarrar adonde quejir.
- Nun senhor, eiqui nun antrais.
- Ye melhor nun bos meterdes cumigo que you sou abogado, inda adbertiu l caçador. Sei de leis i desso antendo you, até sou capaç de bos quitar la cortina.
Cun aquel falar anchado, l tiu de Réfica biu lhougo que tenie a la sue frente alguien anxertado an cuorno de cabra. Buolbiu-le a dezir:
- Nós pulas Tierras de Miranda nun çcutimos cun doutores, tenemos la nuossa lei que ye l R.M.T.P., quier dezir, l Código Napoliónico para Zampatar las Teimas.
L caçador que nunca oubiu falar an tal cousa, quedou mui curjidoso i cheno de ganas an saber l que era, i percurou-le:
- Anton l que ye esse R.M.T.P. que you nunca oubi falar?
Cháma-se Regla de Miranda de ls Trés Puntapies. Ye assi: ampeço you, i dou-bos trés puntapies; çpuis sodes bós i son dous; acaba lhougo que un de nós zista.
L caçador mirou pa la fraca figura de l quinteiro, que yá nun era nuobo, i, porque siempre trabalhou na quinta, nun daba grande muostra de balentie. Pensou pa ls sous botones, nun bou a quedar-me que nin un cagancas, bou a querer i a dar-le ua buona liçon a este barrabotas.
- Stá bien you stou d’acordo, bamos alhá.
L quinteiro dou-le un baliente puntapie na barriga al tripeiro, que botou fuora l zayuno. L segundo fui tan fuorte que la carrelheira branca yá andaba pul chano. L terceiro apuntou pa las partes adonde se cúntan ls galhos i l tiu zbaziaba la tripa todas las manhanas que l chimpou pul chano, que nien un burranco fai tanto puolo quando se rebolca para matar ls chizmos i las pulgas.
A poder de muito sfuorço i gana de bingáncia l caçador alhá se lhebantou. Mei recumpuosto adelantrou:
- Anton agora ye la mie beç, ides a ber cumo eilhas bos ban morder nesse lhombo.
L quinteiro de la Quinta de Réfica dou-le la risa i arrespundiu-le:
- Na, you zisto. Podeis saltar i lhebai l parro.
Faustino Antão