L abórtio

Nun ye la purmeira beç que ls pertueses ancáran cun esta situaçon. Yá an 1998 tamien manifestórun la sue oupenion, adonde solo 50% de la giente botou. Fui pouca giente, ye cierto. Nessa altura fui l “nó”, ou l “não” quien ganhou.
Agora ye ne l die 11 de Febreiro que las pessonas fázen la sue justícia. La pregunta que se pon ne l referendo ye la seguinte: “ Achais bien cun la çpenalizaçon de la anterrupçon beluntaira de la grabideç, se eilha fur feita por scuolha de la mulhier, nas purmeiras dieç semanas, ne l stablecimiento de salude lhegalmente outorizado?”. Ye cierto que hai pessonas a fabor i outras contra, cumo an todo i cumo acuntece an democracie.
Cumo toda la giente sabe, l abórtio ye l salimiento de l ambrion antes de la fin de la gestaçon. Ye sabido que isso an Pertual ye cunsidrado crime. Mas durante estes tiempos, l abórtio ten sido assunto de muitas cumbersas. Será que ua mai ten an si l poder de acabar cua bida houmana? An muitas ceblizaçones essa eideia ye quaijeque ampensable. Bárias anstituiçones ban de acontra al abórtio, cumo ye al caso de l’eigreija, pus diç que isso ye matar ua bida houmana i ten la sue rezon de ser…
Por outro lhado, na bezina Spanha i an outras naçones ye permitido l abórtio até las dieç semanas. You sou a fabor de la çpenalizaçon de l abórtio, puis hai muitos casos an que las pessonas fázen abórtios eilegales assugeitando-se a malas cundiçones, adonde a las bezes quédan cun problemas para toda la bida. A la outra, ls abórtios eilegales son mui caros, a las bezes hai rapazas que son bítimas de biolaçon i quédan grábidas para nun falar an planeamento familiar. Assi se l abórtio fur lhegalizado, ls ancargos eiconómicos son más baixos, las pessonas nun se assugéitan a cundiçones malas para fazer ls abórtios eilegales. Assi bonda a las pessonas íren a ua casa de salude i fazer l abórtio. Talbeç assi an beç de haber dues muortes ( mai i filho), solo haba la muorte de l ambrion. Mas claro que l abórtio solo ye possible até las dieç semanas.
Por isso you gustaba de acunselhar las pessonas a botar ne l referendo i assi dar la sue oupinion nua cousa tan amportante pa la bida i pa la sociadade. Nun deixeis esta decison nas manos de ls outros i an riba de las cuostas de ls bezinos.
Lisandra Castro (12º anho, Agrupamiento de Scuolas de Miranda)