Eiqui an riba

Toca-me pouquitas bezes, mas quando bengo parqui, aporbeito-lo cumo un bielho aporbeita las réstias de sol d’Ambierno.
Que bien se m’anda eiqui an riba!
Bamos pa todos ls lhados i fazemos todo l que hai que fazer, eiqui nun hai cabeça tuorta, braço antalhado, delores de barriga, nada...stou eiqui cumo un paxá ne l sou palácio, an sues almofadas de seda.
Mie mai naciu an Lisboua, nun le gusta nada ber-me eiqui, diç que isto ye un “anacronismo de gente ignorante”! Anaquei?!...sós tu más antendida, ah mai...cun las garraficas de cheiros, i ls cremes, i las loçones, i ls bernizes...que noijo me dá par’isso todo... i l xambre que yá nun sirbe por bias de nun se le ber la marca...i la cabeleireira, que anté m’aguemito quando calha de ir alhá, you nun puodo dezir nada, mas zde que entro anté que salgo nun paro de sgranzinar!...
Eiqui an riba si se me stá bien!
Tirando-se la corteilha de ls cochinos, que si ye un cachico fedionda, si me cunsola bien l’alma ir-le a botar grano a las pitas, i a partir un braçado de leinha, i a la huorta a regar las rodrigas de ls frajones, i trás de las bacas...i anton star a ber fazer l quemer!...ah mai, tu nun beis que you, se podisse, anté eiqui drumie, que a bien dezir, you si me drumo, als cachos, arrolhado pul baláncio de ls passos, cun buonas séstias eiqui me çforro, i adonde iba you a tener un suonho más abançoado, nin Dius cun ls sous anjos!
Eiqui an riba si se me anda bien!
I anton, ser home de scuitar las cumbersas de las pessonas a mirá-le a dreito pa ls uolhos, sin tener que star siempre a mirar al para riba, i andar cun la spina dreita, cun la cabeça pa riba i ls pies pa l chano, cumo Dius, Nuosso Senhor, mos mandou andar...isso si ye de home feito!
I adonde hai farinha láctea enriquecida com ferro e vitaminas que se querga acumparar als miolhicos de pan yá maçcalhados i amolhecidos que eilha me bai dando po riba de l ombro anquanto saca dous lhatos de auga de l poço de la cortina?!...
Que bien se me stá eiqui an riba!
An mi casa, çpéijan-me ne l parque i yá stá! Parque?! Ls parques ténen yerba, i arbres, i páixaros, i sol, i biento... l miu solo ten quatro paredes, cun uas grades ne l meio, bei-se todo als castros acá para fuora, fura melhor que le chamássen la cadena!
Ah mai, tu bien sabes que tu sós la lhuç de ls mius uolhos i you tamien sei que tu anté al Anfierno ibas a saber de l más buono pa l tou nino, anton, al menos esta beç, deixa-te-me alhá de las praias, i de la piele tiznada, i de l iodo que diç l doutor que fai bien, i de ls aldiamentos turísticos...ah mai, se quieres un aldiamento, bamos-mos a quedar l berano todo eiqui, i a aporbeitar anquanto inda haba quien saba atar l xal cumo debe de ser...
Tu nun beis que bien se me anda eiqui an riba, als chins de mie bó?!
Alfredo Cameirão