Burros

Ls burros tamien s’anténden,
Ambora no sou roznar,
A las bezes anté melhor
Qu’alguns homes a falar.

An Miranda nun hai burros:
L que se passou afinal?
Fúrun todos a roznar
Pa la nuossa capital

Ai la grande roznadeira,
Bai na nuossa capital:
Pus ls burros de Miranda
Fúrun pr’alhá afinal!

Agora yá son todos finos,
Acabou la mala pata,
Son todos mui fidalgos,
Anté yá úsan gorbata

Fálan tanto aqueilhes tius,
Julgando melhor s’antender,
Pus ls burros a roznar
Son mas fáceles d’antender.

Ls deputados no Parlamento
Fázen daquilho ua feira,
A mi me fázen lhembrar
Nas eiras la burriqueira.

Cousas dízen alhá drento,
Cun sues buonas maneiras:
Nunca ls burros se lhembrórun
De dezir tantas asneiras.

Boziamos tanto a las bezes,
Als gritos de biba boç,
Chamamos burro als burros,
Mas ls burros somos nós.

Q’amporta que alguns senhores
Me néguen l pensamiento?
Cul título de doutores
Hai ls burros mais dun ciento!

José António Esteves
(Lar de S. José, Bumioso)