Ls Lusíadas

49
Mas, bendo l Persa eilustre que bencido
Fura d’Amor, que, al fin, nun ten defénsia,
Facelmente l perdona, i fui serbido
Del nun causo mui grande, an recumpensa.
Por fuorça, de Judite fui marido
L duro Balduíno; mas el çpensa
Carlos, pai deilha, puosto an cousas grandes,
Que biba i pobrador seia de Flandes.
50
Cuntinando la Ninfa l lhargo canto,
De Soares cantaba, que bandeiras
Fazerie sbolaixar i poner spanto
Pulas roixas Arábicas ribeiras:
– «Medina abominable teme tanto,
Quanto Meca i Gidá, cun redadeiras
Praias de Abássia; Barborá se teme
De l mal de que l ampório Zeila geme.
51
«La nobre ilha tamien de Taprobana,
Yá pul sou nome antigo tan famosa
Quanto agora sobérbia i soberana
Pula sue corcha cálida, cheirosa,
Deilha dará tributo a Lusitana
Bandeira, quando, eicelsa i gloriosa,
Bencindo se oupirá na torre oupida,
An Colombo, de ls própios tan temida.
52
«Tamien Sequeira, óndias Eiritreias
Debedindo, abrirá nuobo camino
Para ti, grande Ampério, que te arreias
De Candace i Sabá ser nial fino.
Maçuá, cun cinternas d’auga chenas
Berá, i l porto Arquico, eilhi bezino;
I fazerá çcubir remotas Ilhas,
Que dan al mundo nuobas marabilhas.

Traduçon de Fracisco Niebro