Medrar

L’alegrie benie-le de mirar para aqueilhes balientes cepos que ardien na fogueira, de mirar pa las lhamaredas que cumo lhénguas de l anfierno apuntában pa l cielo, de ber las ciscas angarriadas. Que siempre se fazie nesse die ne l terreiro de la Capielha. De mirar las lhuzicas de las bumbilhas çpinduradas ne ls palos de pino que ls mardomos habien spetado ne l chano. Que éran siempre ua nobidade. De s’achegar a la doceira de Caçareilhos i mirar to las lhambisqueirices que bendie, de jogar a las scundidas cula sue quadrilha puls alredores de la Capielha, de l chafariç, pulas squinas de la frauga de tiu Jesé Jaquin. Benie-le de la cena an sue casa ser farta de quemer i de giente. Porque habie guisado de cordeiro, botielhos i chouriços i a regalar-se cun toda esta essa fartura stában ls parientes de la Speciosa, de Bilasseco i de Malhadas que se habien quedado pa al bailo de la nuite. Siempre fui tradiçon de ls de fuora nessa nuite cenar an casa de parientes i amigos, i ls pais de Fousto desso fazien queston.
Mas ls uolhos de Fousto agora yá nun se birában tanto pa las bumbilhas, stában mais birados pa las lhuzicas que salien de ls uolhos de las rapazas. Miraba aqueilhas moças que, al mando de las cornetas de tiu Caiatas, s’amparelhában, colában sou cuorpo i sue cara i de mansico mobien ls pies nun baláncio cierto cumo quien quier que las modas románticas nunca chegássen a la fin. Éran ls namorados que para las puntas de l bailo s’apartában i a pormessas i falas doces s’antregában. Fousto passaba la mano pula cara, cumo quien quier saber se ls pelos yá habien nacido i ende stubisse la rezon de tamanho xufrimiento. Era nuobo demais para estas cousas, para se botar a namorar.
Nunca se habie squecido de un die quando se fui para ua buieira l pai deilha haber dezido: cun que anton la checharra yá ten catarro!
Mas se las modas pedidas partien l coraçon de las moças, l del tamien quedaba scachado. Nun sabie bien quando todo esso le acunteciu pula purmeira beç, mas sabie que dantes nun era assi. Era feliç nas fiestas solo cun quemer uns arrebuçados i buer aniç, agora daba-se de cuonta que algo mais fuorte habie chegado. Agora el sabie de quien gustaba, sabie que andaba porqui sabie que ua cumbersica serie la ceçon pa la sue alma i l sossego de todo aquel pulberino.
Cumo las ganas de medrar depriessa éran fuortes, de tener pelo na cara, d’arrefucir las mangas de la camisa, de botar la reilha para loinje, porque fazer la screncha, mirar-se al speilho esso yá el fazie. De tener aquel catarro de giente crecida.
L die que s’arrimaba era l Dous de Febreiro, die grande, die de fiesta an sue tierra, die de Nuossa Senhora de las Candeias.

Faustino Anton