Ter, 15/01/2008 - 11:54
84
Assi, al fin, cunformes las fermosas
Ninfas cun sous amados nabegantes,
L'anféitan de coronas deleitosas
De lureiro, ouro i froles abundantes.
Las manos albas dában cumo sposas;
Cun palabras serenas, cuntratantes,
Se porméten aterna cumpanhie,
An bida i muorte, de honra i alegrie.
85
Ua deilhas, mais grande, a quien se houmilda
La cumpanha de Ninfas i oubedece,
Que dízen ser de Celo i Besta filha,
A quien l fermoso rostro s’aparece,
Anchindo tierra i mar de marabilha,
L capitan eilustre, que l merece,
Recibe cumo un rei, naqueilha hora,
Amostrando que ye grande senhora.
86
Que, adepuis que quien era le dezira,
Cun un çcurso mui guapo i bien falado,
Dou-le a antender que solo eilhi benira
D'anfluença de l siempre armano fado,
Para que çcubrira de l'ounida sfera
De to la tierra i mar nun nabegado
Ls segredos, por alta profecie,
L que sue nacion sola merecie,
87
Lhebando-le la mano, lo guiaba
Pa la punta dun monte alto i debino,
Adonde rica casa s'albantaba,
De cristal toda i de ouro puro i fino.
L mais de l die eiqui cun el passaba,
An doces brincos i an prazer cuntino.
Eilha ne ls paços goza sous amores,
Outras pulas selombras, antre flores.
Traduçon de Fracisco Niebro