Na bida stube perdido

De l’anfáncia a la dolescéncia
Passou a alta belocidade
Quando fui a adar por esso
Tenie passado la mocidade.

Cumo l tiempo nun parou
Nien todo quedou cuncluído
Anté m’apetece dezir
Que na bida stube perdido.

Anté procuro antender
Mas nun ancontro la rezon
Sin Tener tiempo pa la ber
Passei por eilha anton.

Cumo inda eiqui stou
Anté me custa a crer
Passou todo tan a priessa
Nun sei cumo eiqui bin a tener.

Nun parou i nun para
Ye ua ruoda a rodar
Nun perdas l’oucasion
Se la podires agarrar.

Outro galho cantarie
se you la tubisse antandido
No meio desta tormenta
Agora si stou perdido.

Nun ancontro l camino
Por onde deba seguir
Spero, a ber s’ancontro,
Inda nun puodo desistir.

Inda nun sei l resultado
De todo l que se passou
Stá todo tan baralhado
Pus nun sei adonde stou.

José António Esteves
Lar de S. José. Bumioso.