Ls Lusíadas

37
«Mira acá dous Anfantes, Pedro i Anrique,
Família de Juan eilustre i fuorte;
Aquel faç que la fama eilustre fique
Del an Germánia, i anganhe la muorte;
Este, que eilha ne ls mares l publique
Cumo sou çcubridor, i proua i suorte
De Ceuta bote abaixo, que an berdade
Fui l purmeiro que antrou pula cidade.
38
«Bés l Conde Don Pedro, que sustenta
Dous cercos contra to la Barbarie.
Bés, outro Conde stá, que repersenta
An tierra Marte, an fuorças i ousadie;
De poder defender nun se cuntenta
Alcácere, de grande companhie;
Mas defende a sou Rei la cara vida,
Por muro pon la sue, eilhi perdida.
39
«Muitos outros beries, i que ls pintores
Eiqui tamien cun gusto pintarien;
Mas falta-le pinzel, fáltan quelores:
Honra, prémio, fabor, d’arte salien.
Culpa de ls beciados sucessores,
Que éran degenerados nien tenien
L saber i balor de ls sous passados,
An mal gustos i proua anterrados.
40
«Ls pais eilustres donde yá salírun
Giraçones que ampéçan neilhes ende,
Pula bertude muito anton fazírun
I por deixar la casa que se çprende.
Ciegos, que, de ls trabalhos que tubírun,
Se alta fama i balor deilhes se stende,
Perdidos déixan siempre sous menores,
Porque ls pónen an çcansos corrutores!

Traduçon de Fracisco Niebro