LS LUSÍADAS

82
Bede, Ninfas, que angeinhos de senhores
L buosso Teijo cria balorosos,
Que assi sáben preziar, cun tales fabores,
A quien los faç, cantando, gloriosos!
Que eisemplos a feturos buns scritores,
Para spertar angeinhos curjidosos,
Pa ponéren las cousas an mimória
Que mereçan tener eiterna glória!
83
Pus lhougo, an tanto mal, ye oubrigado
Que só buosso fabor nun zapareça,
Percipalmente eiqui, que sou chegado
Donde feitos defrentes angrandeça:
Dai-me-lo bós, que tengo yá jurado
Que nun l ampregue an quien l nun mereça,
Nien por mesura lhoube algun chubido,
Se nun quejir ser mal agradecido.
84
Nien cuideis, Ninfas, nó, que fama disse
A quien al bien quemun i de l sou Rei
Sou anteresse própio anteponisse,
Einemigo a debina i houmana Lei.
Nanhun ambecioso que quejisse
Chubir a grandes cargos, cantarei,
Só pa poder cun torpes eisercícios
Ousar mais lhargamente de sous bícios;
85
Nanhun que use de sou poder bastante
Para serbir a sou deseijo feio,
I que, pa le agradar al bulgo eirrante,
Demuda an mais figuras que Proteio.
Nien, Camenas, tamien cuideis que cante
Quien, cun questume hounesto i grabe, beio,
Pa cuntentar l Rei, n’oufício ousando,
Nuobo, al pobo roubando-lo i znudando!
86
Nien quien acha que ye justo i que ye dreito
Guardar la lei de l Rei, mui eisigente,
I nun acha que ye justo i bun respeito
Que se pague l sudor de la serbil gente;
Nien l que aprende, cun pouco spierto peito,
Rezones, i mangina que ye prudente,
Pa abaluar, cun mano anjusta i scassa,
Ls trabalhos alhenos que nun passa.
87
Falarei solo de ls que abinturórun
Por sou Dius, por sou Rei, l’amada bida,
Que, perdendo-la, an fama l’oumentórun,
Tan bien de las sues obras merecida.
Apolo i Musas, que m’acumpanhórun,
Me drobaran l’anspiraçon pedida,
Anquanto ganho fuorças, mais çcansado,
Pa bolber al trabalho, mais folgado.

Traduçon de Fracisco Niebro