Arrebaladelas

L bielho cura Albano nun s’íba a perdonar, s’acauso nun passasse l teçtemunho, cumo hai uns quarenta anhos atrás el tamien lo habie recebido. Querie deixar todo bien splicado para que l nuobo ancaminador d’almas tomasse lhougo las cousas d’afeiçon.
Éran ls redadeiros dies de sue misson, agora derreado pula muita eidade, andaba alancado i sien salude para cuntinar a tocar este ganado. Fúrun muitos anhos oubindo an cunfisson las facadas i traiçones, zbios i malbadezas. Alguas de quien menos se speraba, mas la bida terrena ten destas cousas, i éran de tal tamanho que muitas bezes le dou gana de boziar als cielos. Aplaquiou esta anfámia nas cunfissones, rogando a las criaturas pecadoras que bundaba dezir que tenien «arrebalado a camino de la fuonte”, que el yá sabie l que se passaba. Fui remédio santo, las cousa quedórun mais fáceles, nenhua bolbiu a dezir adonde i cun quien habie feito l pecado. Para quei, cumo se la traiçon fusse çfrente cun uns que cun outros. Facada ye siempre facada.
Fúrun muitas i muitas las bezes al lhargo destes anhos que al sou cunfessonairo chegaba mais ua dezindo: cura Albano, resbalei mais ua beç a camino de la fuonte. Ancapaç de sanar tamanha chaga, nun fui pula sue parte que alguien quedou por perdonar, siempre fui un manos lhargas na çtrebuiçon de ls perdones de Dius. I oubie siempre: «Lhembra-te cura Albino de las horas, de las missas, de rezar l rosairo, las nobenas, de las horas de cunfisson, botar ls reponsos i cobrar las smolas de ls Santos. Se ye berdadeira la jura que faziste ne l die de la tue cunsagraçon, anton scuita-las, perdona-las pulas sues fraquezas i zairos. Lhembra-te que tamien Adan nun rejistiu a l’amenaça de la maçana i deilha s’antulhou». Mas cuncluie siempre: You a eilhas m’antreguei, cumo pormessa lo habie jurado, se nun las perdonei mais fui porque eilhas nun lo quejírun, s’eilhes s’antulhórun pul alheno la culpa nun ye mie.
I assi chegou l die de l nuobo cura Albino se tornar duonho i senhor de todas las atebidades de la paróquia. Todo starie bien nun fusse ua queston que nun le salie de la cabeça: muitas ties benien a la cunfisson i siempre i amenudas bezes le dezien que habien resbalado ne l camino de la fuonte.
Nuobo porqui, çcoincedor de l que habie sido treminado cul bielho cura Albano, cuidou que l melhor que habie a fazer era tener ua cumbersa cul regidor. I assi fizo. Lhougo que ancuontrou l regidor de l’aldé dixo-le: Cun to l respeito senhor regidor, a ber se dais ua amanhadela ne l camino de la fuonte, pus muita giente ten resbalado alhá. La buossa tie solo esta sumana yá son dues bezes.
Faustino Antão