LS LUSÍADAS

16
Cuidando yá Netuno que serie
Mui stranho causo aquel, manda l mui able
Triton, que chame ls Diuses d’auga frie,
Que pul mar ténen casa saludable.
Triton, que por ser filho se tenie
De l Rei i de Salácia benerable,
Era moço mui grande, negro i feio,
Corneta de sou pai i sou correio.
17
Ls pelos de la barba i ls que abeixában
D’la cabeça puls ombros, só salírun
Oucas chenicas d' água, i amostrában
Que nunca brando peine conhecírun.
Nas puntas çpindurados nun faltában
Las conchas negras, que puli nacírun.
Na cabeça, por gorra, traie puosta
Casca dua lhagosta bien cumpuosta.
18
L cuorpo znudo, i ls nembros genitales,
Nun tubira al nadar ampedimiento,
Traie cun mui pequeinhos animales
De l mar todos cobiertos, mais dun ciento:
Camarones, cangreijos i outros tales,
A quien Febe le dá sou crecimiento;
Cun lhágamo las ostras i cunchicas,
Caramujos sue casca a scarranchicas.
19
Na mano grande concha retrocida
Traie, que cun bien fuorça yá tocaba;
La boç fuorte, i mui alta, fui oubida
Por todo l mar, que al loinge ressonaba.
Toda la camarada, assi salida,
De ls Diuses pa ls palaços caminaba
De l Dius que la Dardánia muralha
Fizo, i ls griegos çfazírun an cangalha.
20
Benie l pai Ouceano, acumpanhado
De ls filhos i las filhas que girara;
Ben Nereu, que cun Dóris fui casado,
Que todo l mar de Ninfas yá pobara.
L porfeta Proteu, deixa l ganado
Marítimo a pacer pula auga clara,
Eilhi bieno tamien mas yá sabie
L que sou pai Lieu ne l mar querie.
Traduçon de Fracisco Niebro