L passado die dezuito de abril, la Casa Comum de la Ounibersidade de l Porto ourganizou la cerimónia OCTAETÉRIDE para comemorar ls sous uito anhos de bida i de ourganizazon de atebidades an bários campos, cumo por eisemplo, l teatro, la spresson plástica, la spresson musical, la dibulgaçon cultural…
Nun de ls campos de dibulgaçon i promoçon de cuntenidos, la Casa Comum – Paulo Gusmão Guedes – ten agarimado, tratado i publicado l nuosso “Terreiro de la Lhéngua 25”, un Podcast morgado an lhéngua mirandesa, que además de haber sido lomeado an 2023 i 2024 al Prémio PODES, cunta yá cun 109 eipisódios, que ban zde las antrebistas até las cuontas tradecionales passando por recuolhas lhenguísticas i/ou culturales.
Neste cuntesto, la ALCM fui galardonada cun l “Prémio Octaetéride – Casa Comum” cumo spresson de reconhecimento público pula colaboraçon stablecida i pula cuntribuiçon amportante pal zambuolbimento i afirmaçon de l porjeto de anterbençon cultural de la Ounibersidade de Porto.
Durante este tiempo, esta colaboraçon arrebelou-se eissencial pa la cunstruçon de ua Casa democrática, plural i abierta a la quemunidade.
De la nuossa parte, pus que béngan más uito anhos a apalancar spressones i atebidades culturales que dan sentido a la bida an sociadade. Oubrigado!
Dalguas atebidades de la ALCM an 2026
Curso de Lhéngua Mirandesa an Lhinha
La ALCM dou por cerrado más un Curso de Lhéngua i Cultura Mirandesa an Lhinha, nible d’Ampeço, na plataforma Moodle, l passado die 10 de márcio.
Este curso, dado pula porsora Ana Afonso, ampeçou l die 6 de janeiro i todas las terças a las nuobe de la nuite, ls 20 alunos que tubírun codícia an se apuntar pudírun daprender más suobre la nuossa Lhéngua i Cultura. Antre eilhes, dalguns a bibir na Tierra de Miranda, outros noutras regiones cumo la Covilhã, Lisboua, ou Helsínquia. La turma era cumpuosta por alunos ounibersitários, porsores, artistas i outras pessonas antressadas an daprender la lhéngua mirandesa.
Cumbén tamien dezir que l curso fui acumpanhado por ambestigadoras lhenguísticas de la Ounibersidade de Coimbra, coordenadas pula porsora Cristina Martins.
Apersentaçon de “Ls Xarutos de l Faraó” ne l Museu Bordalo Pinheiro
A cumbite de l diretor de l Museu Rafael Bordalo Pinheiro, an Lisboua, Dr. João Alpuim Botelho, la ALCM tubo la honra de apersentar “Las Abinturas de TINTIN, Ls Xarutos de l Faraó”, l passado die 21 de márcio.
La Associaçon de Lhéngua i Cultura Mirandesa stubo repersentada pul persidente de la direçon, Orlando Teixeira, pul tradutor de la obra, Alcides Meirinhos i puls sócios António Cangueiro, Teresa Martins i Elisabete Morais. Cun trabalho i codícia de todos, la lhéngua mirandesa spargiu-se más un cachico, fazendo l sou camino toda conha i pimpona antre las outras lhénguas i modos de dezir l mundo.
