Fui a la puorta d’Oulíbia
Stube a la puorta d’Oulíbia
Que fica miesmo na criqueira
Pra saber las nobidades
Eilha ye la purmeira
Juntórun-se a sue puorta
Ls amigos mais chegados
Aparecírun a la reunion
Sin starmos cumbidados.
Tamien staba Zé Fracisco
L home de la Bitória
Mais uas quantas ties
I tamien Marie de la Glória.
Staba tiu Manuel Simon
Que ye un home de respeito,
Muito animou la cumbersa
Cun aquel sou geito.
Falemos de todo un pouco
Anté cousas de l passado
Tamien a la cumbersa
L que Palaçuolo ten mudado.
Cousas que nun sabiemos
Mos las dixo Manuel Simon
Cousas que habien passado
Noutra oucasion.
Dixo, éran tiempos defíceles
Bibie-se cun deficuldade
Podeis acraditar an mi
Que yá tengo muita eidade.
Anton nun acraditamos!?
Sabemos que ye bien cierto,
Agora bemos las cousas
Cumo nun lhibro abierto.
A bós que bos parece,
Tengo ó nun tengo rezon?
Inda me lhembro bien
L que sufrie naqueilha oucasion!
Graças a Dius passou
I que nunca mais apareça
Mas pra isto star assi
Inda me duol bien la cabeça.
Pus bós tiu Manuel
Fazistes l buosso melhor
Cun la buossa ajuda
Palaçuolo stá maior.
You fiç la mie oubrigaçon
Ajudei a demudar l nuosso
Tenemos que fazer por el
Que Palaçuolo ye nuosso.
Fui ua cumbersa animada
Cumo yá muito nun tenie
I fui assi que puli
Passei you aquel die.
José António Esteves
Lar de São José. Bumioso.
