LS LUSÍADAS

73
«Estes i outros Barones, por mil partes
Dinos todos de fama i marabilha,
Fazendo-se na tierra brabos Martes,
Han de gozar ls gustos desta Ilha,
Barrendo triunfantes sous standartes
Pulas óndias que corta aguda quilha;
I acharan estas Ninfas i estas mesas,
Que glória i honra son d’altas ampresas.»
74
Assi canta la Ninfa; las outras todas,
Cun rugidoso aplauso, bózios dában,
Cun que festéian las alegres bodas
Que cun tanto prazer se celebrában.
– «Por mais que de Fertuna ánden las ruodas
(Nua armanada boç todas sonában),
Nun bos han-de faltar, giente famosa,
Honra, balor i fama gloriosa.»
75
Apuis que sastifizo necidade
L sou cuorpo cul nobre mantimento,
I an harmonie i doce suabidade
Bírun los feitos que l’amostra andrento,
Tétis, chena de grácia i grabidade,
Pa que mais glória tenga an sou assento
Las fiestas deste alegre i claro die,
Para l mui feliç Gama assi dezie:
76
– «Faç-te l fabor, baron, la Sapiéncia
Suprema de, culs uolhos corporales,
Beres l que nun puode bana céncia
De ls arrados i mui probes mortales.
Sigue-me firme i fuorte, cun prudéncia,
Tu i ls mais por aquestes outibales.»
Dixo i guiou-los por un monte un rato
Mui ásparo i mui duro a houmano trato.
77
Nun ándan muito que ne l cúmio alto
Se achórun, donde un campo se smaltaba
De smeraldas, rubis, que, dando un salto,
La bista cuida cielo l que pisaba.
Aqui un globo béien n’air, que al alto
Ua clara lhuç por el adrentro antraba,
De modo que l sou centro stá persente,
Cumo sue superfície, claramente.
Traduçon de Fracisco Niebro