La rapaza falaba cun Santa Rita

Cumo era naqueilhas semanas an que amóuchan todos ls santicos, la Zulmira resolbiu-se i fui a la eigreija. Biu-los todos amouchados i dixo, assi stá melhor que nien ls outros me béien.
– Santa Rita, yá bos lhambrais al que bengo, que yá bos acupei mais bezes. Claro que bós inda nun me dezistes nada, mas you sei que bós me quereis bien i nun me ides a deixar sien respuosta.
Daquelha beç Santa Rita falou-le bien:
– Yá que stás tan zasperada, di-me alhá l que quieres.
Fui Pedro, que se fizo passar por Santa Rita. El yá habie bisto mais bezes a falar cula santa i aporbeitou, que staba amouchada, pra se scunder por trás de la cortina i de la santica. Zulmira nunca çcunfiarie que era el que falaba. Cumo tamien el gustaba muito deilha, querie saber l que tenie eilha que le dezier a la senhora. Bien guardadico trás aqueilhes trapos todos fui solo sperar que Zulmira aparecie-se. Quando eilha ampeçou a falar fui só respunder, a las perguntas de Zulmira. I ampeçou:
– Di-me, Zulmira, l que quieres saber?
– Ai, Santica mie, bós si falais…
– Quando quiero falo.
– Stou tan amburgonhada, nin sei por onde ampeçar.
Santa Rita nun dixo nada sperou que Zulmira cuntinasse,
– Bien you, bós yá sabeis, yá bos l dixe tanta beç, mas digo más ua: querie que l dezíssedes a Pedro que you gusto muito del.
– I nun série melhor dezi-lo tu miesma?
– Bó, i cumo fago?, el nun s´anima a falá-me, i ua rapaza parece mal falá-le als rapazes, ante dirie que sou ua oufrecida.
Santa Rita nun dixo nada, derrepente quedou muda. Zulmira fui falando, falando, i nada de la Santa falar. Bien tornou eilha,
– Bós sabeis cumo son estas cousas de rapazes, quando stan al pie de nós, se mos tópan quedamos lhougo tunticas.
Mas nada de la Santa bolber a falar.
– Anton, Santa Rita, nun dezies nada? Santa Rita?! Santa Rita, cumo se nota que la teneis de palo i nun bos pica. Ba, anton que bos parece a respeito de Pedro, dezis-le algue cousa ó nó?
Pedro, yá recumpuosto de l que habie oubido dezier a Zulmira, bolbiu a falar.
– Porquei nun le dizes tu por antermedio de mie?, falas cumigo que ye la miesma cousa que falar cun el. Parece que nun tenes cunfiança na tue Santica… Bien, cumo sei que t’ambergonhas deixa que you le digo algue cousa. Mira Zulmira, acabei de me lhambrar dua cousa a ber se assi resulta: lhougo a la nuite deixas la puorta de l huorto abierta, que you digo-le que baia pra ti.
– Assi tan depriessa?
– Anton tu quieres que t’ajude ó nó? Se quieres, fazes l que you digo, dixo la Santa fazendo-se anraibada.
– Pronto, nun bos anraibeis, dezi-le alhá l que bos pareça, queda por buossa cuonta.
– Assi stá melhor! Anton, a la nuite la puorta abierta…
– Assi será, Santica mie, nun bos ides a arrepender. Andai que l die de Páscua hei de bos anfeitar bien l buosso altar.
La rapaza fui-se, çpuis de rezar la salberrainha i más qualquier cousa pra agradecer a la Santa Rita l fabor que le staba a fazer. L que se passou naqueilha nuite nun sei, l que si sei ye que la cousa resultou. Zulmira i Pedro chegórun-se a casar i fúrun felizes, cula ajuda de Santa Rita claro. De Santa Rita, Zulmira nun abrie mano.

José António Esteves
Lar S. Jesé, Bumioso