Ls Lusíadas

79
Dua pieça, purfeito, nel tenido,
Cumo, al fin, l Modelo que l criou.
Bendo l Gama este globo, quemobido
De spanto i de deseio eilhi quedou.
Diç-le la Diusa: – «Cópia, an reduzido
I pequeinho ambelume, eiqui te dou
De l Mundo als uolhos tous, para que beias
Por donde bás i eirás i l que deseias.
80
«Mira la grande máquina de l Mundo,
Eitérea i eilemental, que fabricada
Assi fui de l Saber, alto i perfundo,
Sien ampeço i cun meta lhemitada.
Quien a la buolta circa este redondo
Globo i sue superfice tan lhimada,
Ye Dius: mas quei ye Dius, naide l antende,
Que angeinho houmano a tanto nun se stende.
81
«La çfera que, purmeiro, bai circando
Las outras mais pequeinhas que alhá ten,
Que stá cun lhuç tan clara relhumbrando
Que bista cega i la rezon tamien,
Ampíreo se nomeia, onde gozando
Las puras almas stan tamanho Bien,
Que solo el s’antende i el s’alcança,
Cun quien nun hai ne l mundo acumparança.
82
«Eiqui, só berdadeiros, gloriosos
Debinos stan, que you, Saturno i Jano,
Júpiter, Juno, fumos fabulosos,
Fenhidos de mortal anganho bano.
Solo pa fazer bersos mui fermosos
Serbimos; i, se mais l trato houmano
Mos puode dar, ye só que l nome nuosso
Nestas streilhas puso l angenho buosso.

Traduçon de Fracisco Niebro