Ls Lusíadas

104
«Eiqui de Don Felipe de Meneses
S’amostrará berrtude, an armas clara,
Quando, cun mui pouquitos Pertueses,
Ls muitos Párseos bencirá de Lara.
I porbaran ls golpes i rebeses
De Don Pedro de Sousa, que porbara
Yá sou braço an Ampaza, que deixada
Berá por tierra, a fuorça só de spada.
105
«Mas déixemos l Streito i mui coincido
Cabo de Jasque, dito yá Carpelha,
Cun todo l sou terreno mal querido
De Natura i de l bien ousado deilha;
Carmánia tubo yá por apelhido.
Mas bés l fermoso Indo, que daqueilha
Altura nace, i acerca, bai correndo
L Ganges, doutra altura eilhi nacendo?
106
«Bei la tierra de Ulcinde, fertilíssema,
I de Jáquete l’íntema ansenada;
De l mar l’anchena súbita, grandíssema,
I la bazie, que fuge apressiada.
La tierra de Cambaia bei, riquíssema,
Donde de l mar l seno faç antrada;
Cidades outras mil, que bou passando,
A bós outros eiqui se stan guardando.
107
«Correr la cuosta célebre Andiana
Bés pa l Sul, até al Cabo Comori,
Yá chamado Cori, que Taprobana
(Que agora ye Ceilan) delantre eilhi.
Por este mar la giente Lusitana,
Que an armas benirá apuis de ti,
Bitórias tenerá, tierras, cidades,
Adonde han de bibir muitas eidades.

Traduçon de Fracisco Niebro