Armandina

Azinolhada delantre de l altar, pensou na sue Birge de l Rosairo i nas lhágrimas que se scurrien de l coraçon siempre que pensaba naqueilha eimaije de santa cun pelo quelor de ouro que quedaba eilhi quetica na eigreija adonde la batizórun. Fazie quarenta anhos que deixara Cicuiro cul sou home i la filha, fugida de fames i canseiras an busca de dies menos agres i más calientes do que naqueilha tierra squecida ne l fin de mundo. Achou l calor i antruidos cume nunca manginou, mas aquel lhembrar de las boiadas no Balhe de la Baglina nien un die le salírun de l’eideia: l pai, l’armana, l armano, cunhados i suogros, todo quedara para trás. Nun fura la cumpanha de l home, de la filha i de los nietos i todo nun passarie dun çterro. I esse anho eilhi staba eilha outra beç delantre de la Santa, ora rezando ora quedando quetica cume un reixenhor amansiado a pedir fuorças para poder tornar un die a sue casa. Si, que la sue casa era lhougo eilhi antre l’eigreija i l ribeiro.
Fúrun salindo daquel sagrado maior que cien eiras de Bouça Çanca cun las promessas cumpridas i los deseios pedidos, adreitos a ua sierra mui alta, anté la penson que l genro habie guardado para çcansar dous ou trés dies cun toda la família naquel lhugar antre sierras, loinge de l mar i de l rebolhiço de la grande cidade. Fúrun chubindo, chubindo anté quedar bien ne l alto i donde se podie abistar meio mundo.
Inda se you bisse los pinhos de tiu Primo na Cándena, pensaba Armandina. Esses abistában-se zde l cabeço de Mogadouro, mas daqueilha Mantiqueira … solo se bien cidades grandes, uas seis ou siete. Al sentir la mano de l sou home ne l ombro, apuntou adreitos al mar, agarrou-le los dedos cun fuorça i dixo-le cun la boç a tembrar que nun passarie outro anho sien buber auga de la fuonte de la Senhora. I inda haberie fuonte de la Senhora?!
Nien meio anho passado i yá eilha i l nieto stában na carreira de l Santos que bai de Lisboua a Miranda. Habie dues nuites que nun drumie, i l suonho tamien nun l apertaba. De Pertual pouco habie coincido a nun ser la biaije anté l barco que la habie lhebado pa l Brasil, mas parecie todo tan çfrente. I staba: l pai, un santo i bun home, i los suogros yá se habien muorto, l cunhado, reformado de l’Almanha, fuora las casas, las stradas, la lhuç por filos, l’auga an canhos, tratores, alcatran i gente bielha de la sue eidade i nuoba que nunca saberie quien era nien que la bisse a la sue puorta.
L coraçon batie más fuorte quanto más cerca staba de l lhugar. Salida de la carreira an Miranda, inda tenie que apanhar outra para Cicuiro. La de Lisboua quedaba eilhi.
Dous ou trés rapazolas de fardeles cun quelores que tamien íban para aqueilhes lhados, era la carreira de ls studantes, ajudórun-la a meter las malas. Si habie crecido Miranda! Dua cousica andrento de las muralhas puso-se quaije anté Peinha Branca! Yá nun pensaba dreito solo de manginar cume ancuntrarie la sue tierra, mas inda le pediu al cundutor que l’abisasse quando chegasse a Cicuiro.
Abisar quando chegasse a Cicuiro? Bá, nun sei porquei, pensában ls estudantes i l cundutor. An Cicuiro nun demudaba nada a nun ser los uolmos que se habien secado todos i un ou outro palheiro caído, mas esso nada, que l demás estaba eigual al que siempre coincírun! Quien serie aqueilha persona i l garotico a falar brasileiro? Al melhor andaba perdida ou buscaba algun amigo ou pariente por aqueilhas paraiges.
Aquel oulhar miraba para todo: la estrada, las touças, l cielo, las personas, nun le scapaba nien mosca. La carreira parecie parada antre l semitério i l meio de l lhugar quando se oube ua bóç:
– Cicouro!
Que poulo dou l coraçon! Si aguantarie? Armandina mirou pa la puorta, aspuis para todos, agarra la mano de l nieto cun fuorça i al pisar fuora de la carreira, antre choros i a celhuçar, a muito custo inda cunseguiu dezir … “o … meu … Cicouro”. Naciu-le ua bida nuoba. Agora si podie chorar a la farta las lhágrimas que quedórun guardadas toda la bida. Ai cachicos que bálen todo l que hai neste mundo i esse era un deilhes.
Ancubriu-se la carreira para alhá de Sant’Amaro i cun las malas de biaige inda ne l meio de la strada, todo mundo cuntinou calhado a oubir l ribeiro que naqueilhes uolhos corrie i que als poucos cebórun ls manantiales lhacrimales de trés ou quatro studantes que se ancantórun a ouserbar l milagre que ua tierra puode faer a ua filha que la bejita aspuis de tanta auga haber nacido na fuonte de la Senhora.

Alcides Meirinhos